زێدان بۆ یه‌كه‌مجار نهێنییه‌ك له‌ باره‌ی گه‌ڕانه‌وه‌ی بۆ ریال مه‌درید ئاشكرا ده‌كات

زیزۆ باسی ئه‌و ساتانه‌ی ده‌كات كه‌ پێرێز په‌یوه‌ندی پێوه‌ كردووه‌

زینه‌دین زێدان راهێنه‌ری یانه‌ی ریال مه‌درید له‌ لێدوانێكدا بۆ یه‌كه‌مجار شێوازی گه‌ڕانه‌وه‌ی بۆ سانتیاگۆ بێرنابیۆ و شوێنگره‌وه‌ی سانتیاگۆ سۆلاری ئاشكرا ده‌كات.

زینه‌دین زێدان له‌ لێدوانێكدا بۆ تۆڕی هه‌واڵی (بی ئێن سپۆرت) ده‌ڵێت: دوای شكسته‌كه‌ی ریال مه‌درید له‌ چامپیۆنزلیگ به‌رامبه‌ر ئایاكس، راسته‌وخۆ هه‌ر هه‌مان شه‌و فلۆرێنتینۆ پێرێز په‌یوه‌ندی پێوه‌ كردم.

زیزۆ گوتیشی: گفتووگۆی من و پێرێز له‌ باره‌ی گه‌ڕانه‌وه‌م زۆر نه‌خایاند هه‌موو شتێك له‌ ماوه‌ی 3 رۆژ یه‌كلایی بووه‌وه‌.

زیزۆ ده‌شڵێت: كاتێك گه‌ڕامه‌وه‌ هه‌ست به‌ گۆڕانكاری زۆر ناكه‌م، به‌خێرایی هه‌موو پشتگیرییه‌كم بۆ دووپات كرایه‌وه‌ و هه‌موومان ته‌نیا له‌م وه‌رزه‌ هه‌وڵده‌ده‌ین له‌ پله‌یه‌كی باش ماڵئاوایی بكه‌ین و هه‌مووان ده‌زانن بردنه‌وه‌ی نازناو له‌م وه‌رزه‌ بۆ ریال مه‌درید بۆته‌ مه‌حاڵ.

زینه‌یدن زێدان ئاماژه‌ی بۆ ئه‌وه‌ش كرد بۆ وه‌رزی داهاتوو زۆر گه‌شبینه‌ و دڵنیایه‌ له‌وه‌ی ده‌توانێت تیپێكی باش بۆ ركابه‌ری كردنی نازناوه‌كان دروست بكاته‌وه‌.

زێدان دوای نزیكه‌ی 10 مانگ دووركه‌وتنه‌وه‌ له‌ ریال مه‌درید جارێكی دیكه‌ گه‌ڕایه‌وه‌ و به‌ گرێبه‌ستێك تا 2022 و له‌ یه‌كه‌مین یاریشی دوای گه‌ڕانه‌وه‌ی به‌ دوو گۆڵی بێوه‌ڵام شكستی به‌ سێلتا ڤیگۆ هێنا.