بەوێنە.. لەبەر زیپکەیەک مارکۆ ئەسینسیۆ کەوتووەتە بەر لێشاوی رەخنەگرتن
K24- هەولێر
دوای ئەوەی مارکۆ ئەسینسیۆ بەهۆی زیپکەهاتن لە قاچی بەشداریی دوایین یاریی ریال مەدریدی نەکرد لە چامپیۆنزلیگ، ئەم یاریزانەی ریال مەدرید لە تۆڕە کۆمەڵایەتییەکانەوە هێرشێکی تووندی کرایە سەر و بە یاریزانێکی بەناز و خۆپەرست تۆمەتبار کرا.
بەر لە یارییەکەی ریال مەدرید لە چامپیۆنزلیگ، کە ریال مەدرید بە سێ گۆڵ سێ خاڵی بەدەستهێنا، زیپکەیەک لە قاچی چەپی ئەسینسیۆ هاتبوو و ئەو یاریزانە 21 ساڵانە لە کاتی تاشینی مووەکانی قاچی، قاچی بریندارکردبوو و بە گوێرەی سەرچاوەکانی میدیا ئیسپانییەکان ئەسینسیۆ نەیدەتوانی گۆرەوی لەپێ بکات، بۆیە لەلایەن زینەدین زیدانەوە بانگهێشتی یارییەکە نەکرا.
ئەم رووداوەی ئەسینسیۆ قسەی زۆری بە دوای خۆیدا هێنا و لە تۆڕە کۆمەڵایەتییەکان هەڵوێستێکی 61 ساڵ لەمەوبەری گۆڵپارێزێک بەبیری ئەسینسیۆ هێنرایەوە، کاتێک بێرت تراوتمان لە ساڵی 1956 لە جامی یەکێتی ئینگڵاند لە یاریی نێوان مان سیتی و بێرمینگهام سیتی سەرەڕای ئەوەی بێرت تووشی شکانی ملی بوو، بەڵام ئامادە نەبوو یارییەکە بەجێبهێڵێت و تا کۆتایی بەردەوام بوو و مان سیتی بە سێ گۆڵ بەرامبەر گۆڵێک سەرکەوتنی بەدەستهێنا.
37 ساڵ لەمەوبەریش فرانز بیکنباوەر سەرەڕای ئەوەی لە یارییەکی هەڵبژاردەی ئەڵمانیا شانی شکا، بەڵام ئامادە نەبوو هەڵبژاردەکەی بەجێبهێڵێت و لەسەر یارییەکە بەردەوام بوو.
فیل نێڤلی بەرگریکاری پێشووی مانچێستەر یونایتد و ئێڤەرتۆن رایەکی جیاوازی هەیە و بەرگری لە ئەسینسیۆ دەکات و پێیوایە شتێکی رەوایە ئەو یاریزانە ئیسپانییە بەهۆی زیپکەیەکەوە بەشداریی یاریی یانەکەی نەکردووە.