ریڤاڵدۆ: شوێنی كریستیانۆ پڕ ناكرێته‌وه‌، به‌ڵام هی مێسی پڕ ده‌كرێته‌وه‌

ریڤاڵدۆ: كریستیانۆ كه‌سایه‌تییه‌كی ترسناك و گه‌وره‌ی له‌ نێو یاریگه‌ هه‌یه‌ و ڕقی له‌ شكسته‌

ریڤاڵدۆ ئه‌ستێره‌ی به‌رازیلی پێشووی یانه‌ی بارسێلۆنا له‌ دیمانه‌یه‌كدا له‌گه‌ڵ رۆژنامه‌ی ماركای ئیسپانیا جه‌ختی له‌وه‌ كرده‌وه‌ كه‌ كریستیانۆ رۆناڵدۆ ئه‌ستێره‌یه‌كی گه‌وره‌یه‌ و ته‌نیا گۆڵكار نییه‌، ده‌شڵێت: كریستیانۆ كه‌سایه‌تییه‌كی ترسناك و گه‌وره‌ی له‌ نێو یاریگه‌ هه‌یه‌ و ڕقی له‌ شكسته‌.

ریڤاڵدۆ گوتیشی: ریال مه‌درید ناتوانێت شوێنی كریستیانۆ پڕ بكاته‌وه‌، به‌ڵام دۆخه‌كه‌ له‌ بارسێلۆنا جیاوازه‌ و ده‌توانرێت شوێنی مێسی پڕ بكرێته‌وه‌.

ریڤاڵدۆ له‌ باره‌ی پێكانه‌كه‌ی مێسی و دووركه‌وتنه‌وه‌ی له‌ بارسێلۆنا گوتی: دوای دابڕانی مێسی سه‌رجه‌م یاریزانه‌كان به‌رپرسیاریه‌تییه‌كی گه‌وره‌تر و هه‌ستیارتریان ده‌كه‌وێته‌ ئه‌ستۆ، به‌تایبه‌تی له‌ دوو یاری داهاتوویان به‌رامبه‌ر ئینته‌ر میلان و ریال مه‌درید پێویسته‌ سوارێز و كۆتینهۆ رۆڵێكی گه‌وره‌تر له‌ جاران بگێرن.

هێرشبه‌ره‌كه‌ی پێشووی بارسا ده‌شڵێت: نازانم ریال مه‌درید راهێنه‌ر ده‌گۆڕێت یان نا، به‌ڵام ئه‌وه‌ی كه‌ گرینگه‌ پێویسته‌ سنوورێك بۆ ئه‌و هه‌موو ئه‌نجامه‌ خراپانه‌ دابنێت و به‌خێرایی كاردانه‌وه‌ی هه‌بێت.

ریڤاڵدۆ ده‌شڵێت: پێموایه‌ هاتنی ئانتۆنیۆ كۆنتی بۆ راهێنه‌رایه‌تی ریال مه‌درید رۆڵێكی گه‌وره‌ی ده‌بێت، چونكه‌ راهێنه‌رێكی گه‌وره‌یه‌ و شایسته‌یه‌كی یانه‌یه‌كی وه‌ك ریال مه‌دریده‌.