دادگەهێن هەرێمێ شکۆدارییا خوە هەیە
ل دەست پێکێ دڤێت ھەمی ئالییەک بزانت، چ پەیوەندییا پارتیا دیموکراتا کوردستانێ وەک حزب ب دادگەھێڤە نینە و ئەو کەسێن ھاتنە دەستەسەر کرن لسەر کێشەیەکێ ھاتنە دەستەسەر کرن، ب ڤیدیۆ دانپێدان کرنە، کو ئەو کارێ پێ ھاتنە سزادان ئەنجام دانە.
تا ڤێرێ چ ئاریشە نینە، چونکە ل ھەموو وەلاتان خەلک ژ ئالیێ دادگەھێڤە دھێت سزا دان، لێ یا جھێ حێبەتیێ ئەوە چ پەیوەندییا حکومەتێ ب دادگەھێڤە ھەیە؟! بۆچی کەسێن خوە ب چالاکڤان دزانن رێزێ ل سەروەرییا یاسایێ ناگرن!؟
بتنێ لسەر شاشەکێ یان پەیچەکی یان رادیویەک مێھڤان بکت یان هەر ل جهەکی دەرکەفت دێ ژ ھەلیل و مەلیل لدژی ئاخ و وەلات و پەرلەمان و دادگەھ و سەرکردێن کورد و خەباتا گەلێ کورد ئاخڤت بێی کو بزانت بۆچی وان ئاخڤتنان دکت و کی وان ئاخڤتنان پێ دکتە کرن!؟
گرتیێن پارێزگەھا دھۆکێ لسەر چەند تۆمەتان ھاتنە دەستەسەرکرن و لدووڤ یاسایێن ھەرێمی و نیڤدەولەتی سەرەدەری لگەل وان دھێتە کرن و رێ ب پارێزەر و خێزانێن وان دھێتە دان سەرەدانا وان بکن، نە وەک ل زۆنا کەسک چەندین کەس ژبەر ئەنجامدانا تاوانان و کارێن نە یاسایی ژ ئالیێ دادگەھێن ھەرێمێڤە ھاتنە داخواز کرن، لێ زۆنا کەسک بۆ وان بوویە باشترین جھ بۆ خوەڤەشارتن و رەڤین ژ دادگەھێ، لێ ھەر ل وێ زۆنێ ھەر کەسێ چالاکییەک کر یان دەنگێ خوە یێ نەرازی دەرێخست، بێی کو ھەر بزانن دادگەھ ھەیە یان نە، چەند چەتەیێن خوە دشینن سەر مالێن وان و وان تیرۆر دکن، نموونەی ژی "کاوە گەرمیانی"، زانایێ قایمقامێ سلێمانی و دووسەیا رۆژنامەڤان ئامانج و خێزان و زارۆکێ وان ھتد...
ل وی سنوورێ کەتیە دەست نیڤ سەرۆک و سیاسیێن دەڤ ب شیر و سنێلەیان، چەندین کەسێن بێ گونەھ ھاتنە تیرۆرکرن و تا نھا ژی بکوژێن وان نە ھاتنە دەستەسەرکرن و بکوژ ژی ددیارن، لێ رێ نادن دادگەھ رۆلێ خوە ببینە و ھەر ئەو ژی رەخنێ ل دادگەھێ دگرن!؟
لێ نزانم بۆچی کەسێن خوە ب چالکڤان دزانن چ کەمپین چێنەکرن!؟ یا ئەو چالاکڤان ژ ترسا گیانێ خوە بێ دەنگ یان ژی دووڤەلانکن و بۆ پەرژەوەندیێن خوە کار دکن!!
خوەزی وە ژی ل شوونا تیرۆرکرن و شەھیدکرنا کوڕێن ڤی وەلاتی، وە ھانا خوە بۆ دادگەھێ بربا و نە جەگەرا خێزانێن وان سوتبا و بێ دادگە وە تیرۆرکرن!
بلا شەھید "کاوە گەرمیانی" وە دادگەھ کربا و شەش سالان حوکم کربا نوکە دناڤ خێزانا خوە دا بوو، کەیسێن دی ژی ب ھەمان شێوە.
لێ یا جھێ داخێ یە ھندەک پەرلەمانتار ژی کەتینە دیف فیتیا وان کەسان، بێ کو ھەست ب بەرپرسیاریێ بکن و رێزێ ل وان یاسایان بگرن کو وان بخوە دەنگ ل سەر دایە.
سەبارەت لێبۆرینا گشتی و تایبەت ژی، ھندەک حەز دکن ڤێ ئێکێ ژی لسەر رێکا وێ یا دروست لابدن، لێبۆرینا گشتی و یا تایبەت ژی یاسا یا خوە ھەیە و ئەو یاسا ژی ل پەرلەمانێ کوردستانێ دەرکەتیە، لێبوورینا گشتی ژ وان کەسان دگرت یێن رەفتارێن وان د زیندانانڤە بەرەف باشیێ چووینە و دێ بەشا مایی یا دەمێ زیندانا وان ھێتە لابرن و دووبارە ڤەگەرن سەر ژیانا خوە یا ئاسایی، لێبۆرینا گشتی ژ سیخور و خاکفروش و تاوانباران نا گرت.
لێ ژبیر نەکن کەسێ کەرکووکا دلێ کوردستانێ ب فرۆشت و دەستێ خوە بکت ناڤ دەستێ نەیارێ کوردستانێ، بۆ وان کارەکێ ساناھییە ھەوڵا شکاندنا شکۆیا دادگەھان ژی بدن.
* ئەندامێ پەرلەمانێ کوردستانێ