ژانە ژین !

د ئەدبیاتێ دا رەنگە ب زەحمەترین نڤێسان ودەربرین بابەتێ پارادۆکسێ بیتن. دێ چاوا شێی هەڤدژا د ئێک تێکست دا ل ئێک کۆم کەی ؟  چاوا مرۆڤ بشێت د کاڤلان دا گۆلان بچینیت؟ ل گۆڕستانان هیڤیان بچینیت؟ ژ شکەستنەکێ سەرکەفتنەکێ ئاڤا بکەت؟ باشتر بێژین، ژ ژانەکێ ژینەکێ دروست بکەت؟

لێ دەما مرۆڤ ب چاڤێن خوە هەست وهەلویستان دبینیت پێتڤی ناکەت وەکۆ نڤێسەرەک یان ئەدیبەک خۆ نیشان بدەت. ب تەنێ بەسە مرۆڤ، مرۆڤ بیت دا بشێت دەربرینێ بکەت. 

بۆیەرکا دلهەژین، برایەک ل پێش چاڤێت خۆ سێ برایان ببینیت یێ د خۆینێ دا دگەڤزن، دایکەک ل بەر دلێ خۆ سێ جاران جەگەرا خوە بن ئاخ بکەت! ئەو بۆیەرا هێشتا خێرا سێرۆژکی یا وێ نەهاتە گێران! ژ ڤەرێژا هزرەکا ژ دایک بووی ژ تاریستانێ. شەڤرەڤینکێن نێڤا شەڤێ ب زالمانە وبێ وژدانانە، هەموو وژدان ل وەلاتێ مە هەژاندین. وبۆ مە چیرۆکا شێرە ژەنەکێ نڤێسی!!!

پشتی ڤێ بۆیەرێ ب گەرۆیەکا تژێ گری برا هەوارا خۆە د گەهینتە برای! ب تنێ بۆ هەمبیزیکێ بۆ(دەست ل مل کرنەکێ) ژ کەسەکێ کۆ گەلەگ ژێ ب باوەر دبێژیت:( دەنگم دەگینمە کاک مەسرور کاک مەسرور بارزانی بە هانام وەرە، وەرە دەست لەملم بکە ....). ئەڤ خواست وداخازا برایێ سێ شەهیدان بوو ب تنێ ل هیڤیا رۆژهەلاتنێ بوون دەما دیتی یێ د وێ هەمبێزێ دا وئەو دەست یێ ل سەر ملێ ئەوی هەوارا خۆ گەهاندیێ.

سەرکردە نابێت ب جاڤێن رۆندەکڤە بهێنە دیتن! دیتنا گەلەگ کەسانە. بەلێ وەختێ هەستێن راستەقینە د گەل ژانەکا راستەقینە تێکهەل دبیت ب تنێ رۆندک ئاراستەیان د گۆهرن. وئەو رۆندک ئەو بوون ئەوێن روویێ راستەقینەی سەرکردەکی دیار کرین کا چەند یێ تێکهەلی ژان وژینێن خەلکێ خۆیە. پێناسا کارێزمایێ چ هێلێن سۆر بۆ سەرکردەیا ندیار نەکرینە، بەلێ هەموو دهەڤ بۆچۆنن کۆ کارێزما حالەتەکێ دەرۆنی یە ژ دەرۆنەکێ ساخ وساخلەم ژ دایک دبیت. و دەرۆنێن ساخ وتەندۆرست ل شادییان دلشاد دبن ول شینیان دگرین! ئەڤە دهێتە وێ مەعنایێ مرۆڤ دشێت ب دەربرینەکا راست ودروست ( ب تایبەت دەما کۆ سەرکردە بیت ) کاریزمەکێ دروست بکەت. ئەو کاریزما ڤەرێژا راستی یا مرۆڤی بیت،ودگەل کار وکریار وئارمانجێن مرۆڤ ل سەر هاتیە ئاڤاکرن بگۆنجیت وهەبۆنا خۆ تێدا ببینیت.

وێنێ زارۆکەکێ ل کەمپەکا پەنابەرێن رۆژئاڤا کۆ ژ دڵ وجان دەستێ خۆ د گەردەنا مەسرۆر ئالاندی. دەنگێ خۆێندەڤانەکێ بێ ناز کۆ هەموو گازندێت خۆ گەهاندی، گازیا بریندارەکێ شەرێ داعش، هەوارا بن ئاڤبۆیەکێ لێمشتا هەولێر. ل بەر سینگرتنا کۆرێ دلسۆزەکێ وەکۆ فەرست سۆفێ.... هتد. میناکێن رژدی ودلسۆزی وراستییا مرۆڤەکی نە. ئەفلاتۆن د پەرتۆکا خۆ یا (کۆمار) دا دبێژیت (پێتڤییە حەکیم حاکم بن، حاکم د حەکیم بن). ئەڤا دهێتە دکرن ودهێتە دیتن ب خو ەحیکمەتەکە!!! حیکمەتەک کۆ ژ ناخەکێ دلسۆز سەرهلددەت. یێ پیچەک د زمانێ جەستی تێبهگەهێت دزانێت ئەڤە دەربرینێن راست و دۆرستن، نە زارڤەکرنە. نە باڵ راکێشینە بۆ خوە. یێ ڤێ راستێ ژیک نەزانێت دێ پسیار کەت ( بۆ سەرۆکێ حکۆمەت پێناکەنیت، بۆ دەمۆچاوێ گرژە ؟ )، ئەڤ پسیارە نیشانا نە جۆدا کرنێ یە د ناڤبەرا رۆژدی وگرژیی دا. ئەڤا هوون د وان سەرچاڤا دا دخۆێنن نە گرژیە، رۆژدیە. ب چ پێبکەنم؟؟؟ ب وان هەموو قیرانێن ب شەڤ رۆژ بزاڤێ دکەم چارەسەر بکەم؟ ب وان ژانێن وەلاتێ خۆ؟ ب گریا زارۆکێن مللەتی خوە؟ ب هێرشین دۆژمنێن نافخۆ وژ دەرڤە؟ بۆ ئێک چرکە خوە ل جهێ من دابن (Put your foot in my Shoes). دا بزانین ئەو چ هەستن من هەی و هەوە ئاگەه لێ نە.

دیڤید ئیستۆن دبێژیت (سیستمێ سیاسی پێک دهێت ژداخوازی وڤەرێژان، داخازێ ژلایێ وەلاتیان ڤە دهێنە کرن، دچنە د ناڤ سیستەمێ سیاسی، دهێنە شرۆڤەکرن وژ هەڤجۆداکرن، و دبنە بریار وکریار، باشترێن سیستەم ژی  ئەوە یێ گرنگیێ ب ڤان دخوازیا ددەت. و بریار وکریارێن د پەرژەوەندا مللەتی دا دەردکەت). هەتا نۆکە ئەوا دهێتە دیتن ژ کابینەیا نەهێ یا حکۆمەتا هەرێما کۆردستانێ جیبەجیکرنەکا راستەقینەیا ڤێ پێناسەیا سیاسی یە بۆ سیستەمێ سیاسی. سەرەرای هەبوونا ب سەدان ئاستەنگان، دیسان ژی شیایە خۆ ل بەر هەموو با و بارۆڤان مکۆم راگریت. باشترێن ونێزکترین بەلگە ژیک ئەو سەرەدانا سەرۆکێ حکۆمەتا هەریما کۆرستانێ بۆ برا ودایک ومالباتا هەرسێ شەهیدان ل رۆژا ئەینی رێکەفتی 3/12/2021 بوو.

ل دوماهیێ من دڤێیت بێژم کەلهەکا گەلەگ ب نرخ وقیمەت هاتیە ئاڤاکرن ژ باوەر و باوەر بۆنێ سەرەرای هەبۆنا قەیرانا (عەقیدێ) ل وەلاتێ مە. نها نێزیکە ئەڤ عەقیدە یا دهێتە ئاڤاکرن ل سەر بنەمایێ رەوایەتیێ (شەرعەیەتی) ب تنێ ئەڤێ گەلهێ پیتڤی شۆرهە وپارێزڤانێن باش هەیە.