مەبن بە شاگرد و كلیل هەڵگری خەزێنەی خەڵكانی تر

Kurd24

لەبەر ئەوەی زۆربەی زۆری خەڵك و گرووپە سیاسیەكان لە هەرێمی كوردستاندا بە چاوو هەست و سۆزی ڕووتەوە تەماشای ململانێ و جەنگەكانی دنیا دەكەن نەك بە لۆژیك و ئاوەزی شیكارییانەوە، بە ناوی لایەنگیریكردنی دروست شتێك لە ڕوانینیاندا شك نابەین، چ لە ژێر ناوی لایەنگیری ئایینی یان نەتەوەیی یان لایەنگیریی نیشتمانیدا، تەنانەت كاتێك لە خەڵكی لایەنگیر ڕادەمێنم وەك ئەوە وایە  لە دەرەوەی یادەوەری مێژوویی خۆیاندا بژین.

بۆ نموونە لەم جەنگە ماڵوێرانكارەی حەماس و ئیسرائیلدا، گرووپێك لە خەڵك دەبینین پشتگیری لە بەرەی موقاوەمەت دەكەن كە شیعەكانی دنیا ڕێبەرایەتی و شەڕی مان و نەمانی لە پێناودا بەرپا دەكەن، لە بەرانبەردا گرووپێك خەڵكانی تر هەن پشتگیری لە دژبەرەكانی بەرەی موقاوەمەت دەكەن ئەوانیش كەسانی سەرسامن بە ئەمەریكا و بلۆكی خۆرئاوا، ناتوانین بڵێین هەردوو بەرەكە (كە بە چەند پەتكە داوێكی گەشبین یان ڕەشبین خۆیان بەستۆتەوە) لە سیاسەتدا كۆڵەوار نیین، ئەگەر بێت و بەو مانا ڕیالیستیە تەماشای سیاسەت بكەین كە سیاسەت بریتیە لە هونەری بەڕێوەبردنی بەرژەوەندییەكان، چونكە هەردوو بەرەی موقاوەمەت و دژە موقاوەمەت بایی میسقاڵە گەردێك سوودیان بۆ بەرژەوەندی نەتەوەی كورد و دۆزی كوردستان نەبووە و نابێت، سۆز و عاتیفەی كوردیشیان هیچ بە لاوە گرنگ نەبووە و ناشبێت، زۆربەی ماڵپەڕ و كەناڵە كوردییەكان لە بری ئەوەی بە وردی شیكاری ماتماتیكی و فیزیای ڕووداوەكان بكەن، بە ختوكەدانی سۆزدارییەوە ئاوی زیاتر دەڕێژنە ئاشی هەردوو لایەنگرانی بەرەی موقاوەمەت و بەرەی دژە موقاوەمەتەوە، ئیتر ئەوە لە بیر دەكەن كە كورد دۆزێكی مرۆیی ڕەوای فەرامۆشكراوی لە دنیادا هەیە و دۆزەكەی خۆی زۆر تراژیدیایی ترە لە دۆزی فەڵەستین لە كاتێكدا خەڵكی ئێمە لە هەموو داماوەكانی سەر زەمین داماوتر و بێكەسترن و فرمێسك بۆ غەزەش دەڕێژن.

دۆزی كورد زۆر لە هێز و وزەی ئیسرائیلێك گەورەترە كە ڕۆژێك لە ڕۆژان لە پێناوی بەرژەوەندی خۆیدا ویستێكی بۆ هاریكاریكردنی شۆڕشی ئەیلول هەبووە بەڵام بەرژەوەندییەكی باڵاتر وای لێ خواست كە ژێراو ژێر رێكەوتنێكی هەواڵگرییانە لەگەڵ رژێمی بەعسدا ئەنجام بدات و لە نیوەی ڕێگادا كورد بە گورگان خوارد بدات، ئێستا بەم كێشمەكێشەی نێوان ئەو دوو بەرەیە ئیتر دنیا لە جاران زیاتر كورد فەرامۆش دەكەن و ناوی كوردستان لە كولەكەی تەڕیشدا ناهێنن، كە دەڵێم دنیا مەبەستم لە دنیای ڕاگەیاندن و فیكرە پێش دنیای بازرگانی و ئابووری وسیاسەت و مافە ڕەواكانی مرۆڤ و ڕای شەقام، هەردوو لایەن و خەڵكە هەڵچووەكەی لای خۆمان چ ئەوانەی ئاوات بە سەركەوتنی بەرەی موقاوەمەت یان ئەوانەی ئاوات بە زاڵبوونی دژبەرەكەی دەخوازن، ئەو ئاوات خواستنەیان لە بەرژەوەندی و حاڵی شپڕێوانەی خۆیانەوە نییە، چونكە ئەو دوو بەرەیەی ئێستای شەڕكەر، نە لە ساتەوەختی شكست و لاوازییاندا و نە لە ساتەوەختی سەركەوتن و بەهێزبوونیاندا پشتی دۆزی كوردیان نەگرتووە و تەنانەت ددانیان بەوەشدا نەناوە كە كورد مافی مرۆڤایەتیانەی وەك مافەكانی گەلانی وەك خۆیان هەبێت، لە كاتێكدا زۆر ئاشنای ڕەوایەتی دۆزی كوردن.

باشترین بەڵگەی نزیكیش پشتلێكردنی هەردوو بەرەی بەشەڕهاتووی ئێستایە لە ئەنجامەكانی ڕیفراندۆمێكی ئاشتیخوازانەی چەند ساڵێكی لەمەوبەری هەرێمی كوردستان، كاتێك زۆربەی زۆری خەڵكی شارەكان دەنگیان بە بەڵێ بۆ سەربەخۆیی نیشتمانی دێرینیان دا، دواتر بەرەی موقاوەمەت بە گەمارۆدان و ئاگر و ئاسن و بەرەی دژە موقاوەمەتیش بە نتەق لەخۆ بڕینەوە پێشوازییان لە ئەنجامەكانی كرد، هەر بەرەیەكیان بە میكانیزمێكی جیاواز لەوی تر ڕێزیان بۆ ویست و ئارەزووی گەلێك دانەنا كە داوای هەمان ئەو مافانەیان كرد كە خودا بەخشیویەتی بەوانی تری مرۆڤ، كەواتە درۆیەكی گەورەیە بڵێین هیچ كام لەو دوو بەرەیە خودایان خۆش بوێت، بەرەی موقاوەمەت سەركوتكردنی كورد بە لایەوە دەسكەوتێكی میلیتاری و مەزهەبیە، زمانبڕینی كورد لە بەرژەوەندی كەڵەگایی خۆیاندایە، بەرەی دژە موقاوەمەتیش خۆ لە گێلی دان و چاونوقاندنیان لە ئاست ویست و حەزی دەنگدەرانی كوردا بابەتێك نەبوو كە لە بەرژەوەندی سیاسەتی ڕۆژانەیاندا بێت.

بە واتایەكی ترهەردوو بەرەی ئێستای شەڕكەر دەستەیەك كلیلیان هەیە بۆ كردنەوەی قاپیەكانی ئەو خەزێنانەی كە بەرژەوەندییان لە ناوچەكەدا دەپارێزێت و پێیان باشە كوردیش بكەنە پاسەوانی ئەو خەزێنانە و وەك كۆیلەی بەر قاپی خۆیان بێت، كەواتە كورد بە بێ ئەوەی هیچی دەست بكەوێت بە لایەنگیری كردنی پەڕگیرانەی ئەم یان ئەو بەرەی شەڕ لە ئاكامدا دەبێتە شاگرد و كلیل هەڵگری بەرژەوەندیەكانی خەڵكانی تر، لە ڕووی مرۆییەوە ئاساییە خەمێك لەو خەڵكە سڤیلەی هەردوو لا بخوات كە كراونەتەوە سوتەمەنی شەڕەكە، چونكە كورد لە هەموو نەتەوەیەك زیاتر لە مێژوودا خەمی لە بێ هەڵوێستی دنیا چەشتووە كاتێك لە لایەن دەرودراوسێی خۆیەوە جینۆسایدیان دەكرد كەچی ویژدانی دنیا بە  ڕێكخراوی نەتەوە یەكگرتووەكانیشەوە لە شیرینی خەودا بووە، بەڵام لە ڕووی ئەوەی لەم شەڕە ماڵوێرانكارەیەدا  پشتگیری لە كام بەرەیان بكات، ئەوە بەرپرسیارێتی بەشێك لەو خوێنڕشتنە بێهوودانەیە دەخاتە ئەستۆی خۆی.