پارتیكوژی براكوژی نییه!
ده‌بێت پێناسه بۆ شه‌ڕی ناوخۆ بكه‌ینه‌وه، بۆ براكوژییش. ئه‌م پێناسه‌یه‌ی ئێستا به‌رچاومان ڕوون ناكاته‌وه. ئه‌وه‌ی خۆتان له‌گه‌ڵ خه‌ڵكی ده‌یكه‌ن و پێی ده‌ڵێن شۆڕش، ئه‌گه‌ر خه‌ڵكی له‌گه‌ڵ ئێوه بیكات، خۆتان پێی ده‌ڵێن: شه‌ڕی ناوخۆ. كۆمه‌ڵێك نووسه‌ری حازر به‌ده‌ستیش به وتاری درێژ و به‌یاننامه‌ی قه‌به، ته‌شریعاتتان بۆ ده‌كه‌ن و جنێوه‌كانتان به پارتی بۆ حه‌ڵاڵ ده‌كه‌ن.
ئه‌مه بێمانایه، ئه‌گه‌ر له ته‌ره‌فی تۆوه هێرش بكرێت، پێی ده‌وترێت شۆڕش، به‌ڵام ئه‌گه‌ر لای پارتییه‌وه وه‌ڵام بدرێیته‌وه پێی بوترێت شه‌ڕی ناوخۆ. له نه‌ستی ئێوه‌دا شه‌ڕی ناوخۆ بریتی كراوه له‌وه‌ی كه: پارتی له‌گه‌ڵ ئێوه بیكات، گه‌رنا ئێوه له‌گه‌ڵ پارتی بیكه‌ن، پێی ده‌ڵێن شۆڕش، بوێری، ئازایه‌تی، قاره‌مانی و هه‌زاران به‌یت و بالۆره‌ی تری سه‌ر جه‌ریده و په‌یجه‌كانتان.
تا سی ساڵێك له مێژووی ڕابردووم سه‌یر كرده‌وه، به درێژایی ئه‌و سی ساڵه، ئێوه ته‌نیا به‌و شه‌ڕانه‌تان وتووه شه‌ڕی ناوخۆ (كه پارتی له‌گه‌ڵ ئێوه كردبێتی) هه‌رگیز به‌وه‌ی خۆتان نه‌وتووه شه‌ڕی ناوخۆ و براكوژی، چونكه ئێوه پێتان وایه ئه‌گه‌ر پارتی بكوژن، براكوژی نییه و قاره‌مانێتییه، چما ئێوه له كوێ پارتییه‌كتان پێ برا بووه؟ له هه‌ر خۆپیشاندانێكتاندا ویستووتانه بچنه سه‌ر مقه‌ڕه‌كانیان و هه‌رچی مرۆڤی تیایه، بیسووتێنن. له شه‌ڕی ناوخۆی كۆتایی نه‌وه‌ده‌كانیشدا، پارتی هه‌ر كه‌سێكی ئێوه‌ی بكوشتایه، پێتان ده‌وت شه‌هید، كه‌چی كه خۆتان پارتیتان ده‌كوشت، پێتان ده‌وت (كه‌لاكی تۆپیو! جاش! خۆفرۆش!) ئێوه له شه‌ڕ و له ئاشتیشدا هه‌ر به‌لای دژه‌كه‌ی پارتیدا ده‌یشكێننه‌وه. پارتی و په‌كه‌كه شه‌ڕیان تووش بێت، هه‌ر دژی پارتی وتار ده‌نووسن. پارتی و یه‌كێتی نه‌سازێن، هه‌ر خه‌تای پارتی ده‌گرن. ته‌نانه‌ت كه داعش په‌لاماری كوردستانیدا و به‌ره و سنووره‌كانی ژێر قه‌ڵه‌مڕه‌وی پارتی هات، هه‌ر مه‌عنه‌وییه‌ن پاڵپشتی داعشتان ده‌كرد و به كه‌یفخۆشییه‌وه سه‌یری شه‌هیدبوونی پێشمه‌رگه‌ی پارتیتان ده‌كرد. كه مه‌خموور گیرا چه‌پڵه‌تان لێ ئه‌دا و (قاقا و هاها)تان له كۆمێنت داده‌نا. هه‌مووشمان بیرمانه و زۆری به‌سه‌ردا نه‌چووه، كه حه‌شدی شه‌عبی ده‌یویست هه‌موو كوردستان داگیر بكات، ئێوه چۆن ڕێی هه‌ولێرتان نیشان ده‌دا.
تۆ هه‌ر به سرووشت له‌گه‌ڵ هه‌موو ئه‌و گروپ و ده‌سته و تاقم و ئایدۆلۆژیا و خێڵ و خه‌یاڵانه‌یت كه له لاشعوری خۆتدا (به دژی پارتی ده‌یان بینیت)، جا ئیدی په‌كه‌كه بێت، حه‌شدی شه‌عبی بێت، داعش بێت، یه‌كێتی و نه‌وه‌ی نوێ و هادی عامری و ئیسماعیل قائانی و حه‌سه‌ن نه‌سروڵڵا یان هه‌ر گه‌له و گۆبه‌ندێكی تر بێت.
تۆ له‌گه‌ڵ هه‌موو كه‌سیت، له‌گه‌ڵ حه‌شدی شه‌عبیت كاتێك بیه‌وێت هه‌ولێر داگیر بكات و پارتی بڕووخێنێت. له‌گه‌ڵ ئێرانیت، ئه‌گه‌ر تۆپبارانی ئه‌و سنوورانه بكات كه پارتی فه‌رمانڕه‌وایانه. له‌گه‌ڵ كازمی بوویت، ڕێك له‌و كاتانه‌ی كه پێتان وابوو دژی پارتی ڕه‌فتار ده‌كات، هه‌موو په‌یج و فه‌یسبووكه‌كانتان پر كرد له وه‌سفی ئه‌و پیاوه، له سلێمانی چوونه پێش ماشێنه‌كانی و ده‌تان وت"كازمی... كازمی... تۆ بۆ ئێمه لازمی" خۆ دیار بوو له داخی پارتی چه‌نده په‌سنتان ده‌دا و پیادا هه‌ڵتان ده‌گوت. به‌ڵام كاتێك له‌گه‌ڵ حكومه‌تی هه‌رێم و به دروستیش له‌گه‌ڵ پارتی ڕێككه‌وت له مه‌سه‌له‌ی شه‌نگال، هه‌مووتان پشتتان تێكردووه و ئێستا له فه‌یسبووكه‌وه وه‌سفی ناكه‌ن، ئه‌رێ خێره؟ بۆچی كازمی تا ئه‌و كاته فریادڕه‌سی ئێوه‌یه كه له‌گه‌ڵ پارتی نه‌سازێت؟
ناوچه‌كه‌تان، حیزبه‌كه‌تان، جوگرافیا و جۆگه‌تان، پێویستی به ڕابه‌رێكی به سه‌لیقه‌یه، تكایه بۆ خۆتانی بدۆزنه‌وه.