سه‌رۆكايه‌تى هه‌رێم: هيوادارين هه‌ڵبژاردنى توركيا به ئارامى به‌ڕێوه‌بچێت
K24- هه‌ولێر
له راگه‌يه‌ندراوێكدا سه‌رۆكايه‌تى هه‌رێمى كوردستان ئيدانه‌ى ته‌قينه‌وه‌كه‌ى شارى ئامه‌دى كرد و رايگه‌ياند، هیواخوازين هەڵبژاردن لە هێمنی و ئارامی و لە كەشێكی دیموكراسیانە بەڕێوە بچێت.
رۆژى هه‌ينى 5ى حوزه‌يران/يۆنيۆى 2015، دوو رۆژ به‌ر له ده‌ستپێكى پرۆسه‌ى هه‌ڵبژاردن، له شارى ئامه‌د، ته‌قينه‌وه‌يه‌ك روويدا و به هۆيه‌وه ده‌يان هاووڵاتى گيانيان له‌ده‌ستدا و برينداربوون.
ئه‌و هاووڵاتيانه سه‌رقاڵى بانگه‌شه‌كردن بوون بۆ پارتى ديموكراتى گه‌لان ناسراو به هه‌ده‌په كه پارتێكى كوردييه و سه‌ڵاحه‌دين ده‌ميرتاش سه‌رۆكايه‌تى ده‌كات.
له راگه‌يه‌ندراوه‌كه‌ى سه‌رۆكايه‌تى هه‌رێمدا هاتووه: "سەرۆكی هەرێمی كوردستان ئیدانەی ئەو تەقینەوانە دەكات و ئومێدی ئەوە دەخوازێ هەڵبژاردنەكانی توركیا لە بەرژەوەندیی گەلانی توركیا بە ئەنجام بگات. هەروەها بەڕێزیان هیواخوازە هەڵبژاردنەكان لە هێمنی و ئارامی و لە كەشێكی دیموكراسیانە بەڕێوە بچێت".