ئەردۆغان بە سەركوتكردنى ئازادى میدیا تۆمەتبار دەكرێت
K24 – ھەولێر
پەیامنێرى رۆژنامەى حوڕییەتى توركیا لە واشنتنەوە رایگەیاند، رەجەب تەیب ئەردۆغان، سەرۆك كۆمارى توركیا هەڵمەتێكى دیكەى دژ بە ئازادى راگەیاندنى دەستپێكردووە.
تولجا تانس، بۆ ئاژانسى هەواڵدەرى رۆیتەرز قسەیكرد و رایگەیاند، بە تۆمەتى سوكایەتیكردن و هەوڵدان بۆ ناوزڕاندنى سەرۆكى توركیا، پارێزەرى ئەردۆغان سكاڵایەكى لە لاى داواكارى گشتى ئەستەنبوڵ لە دژ تۆمار كردووم.
پارێزەرەكەى ئەردۆغان، دواى بڵاوبوونەوەى وتارێكى تانس، بە ناونیشانى "سەرۆكى ئەمریكا و پیاوێكى كەشخە" كە تێیدا باسى ئۆباما و ئەردۆغانى كردبوو، سكاڵاى تۆمار كردووە.
تانس دەڵێت، لەو بابەتەدا رووى رەخنەم ئاراستەى هەریەك لە ئەردۆغان و ئۆباما كردووە، لە ژمارەیەك بابەت و پرسدا، بەڵام بڕوا ناكەم ئۆباما خۆى بەوە سەرقاڵ بكات رێگەى دادگام لە دژ بگرێتە بەر.
نەیارانى سەرۆكى توركیا لەو بڕوایەدان، ئەوەى ئەردۆغان دەیكات هەڵمەتێكى بەرنامە بۆ داڕێژراوە بۆ سەركوتكردنى دەنگى رەخنە و ئازادى راگەیاندن.
مانگى رابردوو، لەسەر داواى حكومەتى توركیا، داواكارى گشتى لە هەوڵى ئەوەدا بوو دوو كەناڵى تەلەفزیۆنى دابخات.