سه‌رۆكايه‌تى هه‌رێم قسه‌كانى مه‌لا به‌ختيار ره‌تده‌كاته‌وه‌

سه‌رۆكايه‌تى هه‌رێم رايگه‌ياند، كوردستان جێگه‌ى حه‌شدى شه‌عبى نييه‌.

 K24 – هه‌ولێر:

سه‌رۆكايه‌تى هه‌رێمى كوردستان لێدوانه‌كانى لێپرسراوى ده‌سته‌ى كارگێڕى مه‌كته‌بى سياسى يه‌كێتى نيشتيمانى كوردستان مه‌لا به‌ختيار ره‌تده‌كاته‌وه‌.

گوته‌بێژی فه‌رمیی سه‌رۆكایه‌تی هه‌رێمی كوردستان رایگه‌ياند، "هێنانی حەشدی شەعبی بۆ نێو خاكی كوردستان نە بە رەزامەندی  سەرۆك بارزانی بووە و نە كەسیش داوای لێ كردووە رەزامەندی پێشان بدات".

له‌ روونكردنه‌وه‌يه‌كدا، كه‌ له‌ ماڵپه‌ڕى سه‌رۆكايه‌تى هه‌رێم بڵاوكراوه‌ته‌وه‌، هاتووه‌: "جەنابی سەرۆك بارزانی جەخت لەوە دەكاتەوە كە خاكی كوردستان جێگەی حەشدی شەعبی نییە و كوردستان پێشمەرگە و هێزی ئاساییشی خۆی هەیە و پێویست بە هیچ هێزێكی تر ناكات".

 

ده‌قی روونكردنه‌وه‌ی گوته‌بێژی فه‌رمیی سه‌رۆكایه‌تی هه‌رێمی كوردستان:

لە كۆڕێكی لێپرسراوی دەستەی كارگێڕیی مەكتەبی سیاسیی یەكێتی نیشتیمانی كوردستان لە زانكۆی سلێمانی لەبارەی هاتنی حەشدی شەعبی هەندێ قسە كراوە و ناوی بەڕێز سەرۆكی هەرێمی كوردستان هاتووە و لە میدیاكانیش خوێندنەوەی جۆراوجۆر بۆ ئەم بابەتە كراوە.

لێرەدا بە گشت لایەكی ڕادەگەیێنین كە سەبارەت بە بابەتی حەشدی شەعبی هەڵوێستی بەڕێز سەرۆكی هەرێمی كوردستان لە ئێستا و لە پێشوودا زۆر ڕوون و ئاشكرا بووە كە هەرێمی كوردستان لە تێكشكاندن و لەناوبردنی تیرۆریستاندا ناكۆكی لەگەڵ حەشدی شەعبیدا نییە و هەر كات بۆ شەڕكردن لەگەڵ داعش پێویست بێت هێزی پێشمەرگە و حەشد یارمەتیی یەكتر بدەن. بەڵام ئەوە بەو مانایە نییە حەشدی شەعبی بێت دوزخورماتو داگیر بكات كە خاكی كوردستانە و پێشمەرگە دەیپارێزێت.

جەنابی (سەرۆك بارزانی) جەخت لەوە دەكاتەوە كە خاكی كوردستان جێگەی حەشدی شەعبی نییە و كوردستان پێشمەرگە و هێزی ئاساییشی خۆی هەیە و پێویست بە هیچ هێزێكی تر ناكات. هێنانی حەشدی شەعبی بۆ نێو خاكی كوردستان نە بە ڕەزامەندی  (سەرۆك بارزانی) بووە و نە كەسیش داوای لێ كردووە ڕەزامەندی پێشان بدات بۆ هاتنی حەشدی شەعبی.

گوتەبێژی فەرمیی سەرۆكایەتیی هەرێمی كوردستان.

18ـی 11ـی 2015