ئۆباما وپۆتین قەیرانی سووریا و دۆخی ئۆكراینا تاوتوێ دەکەن
باراک ئۆباما، سەرۆکی ئەمریکا و ڤلادیمیر پۆتین، سەرۆکی رووسیا لە پەراوێزی كۆنگرەی كەش و ھەوا لە پاریس قەیرانی سووریا و دۆخی ئۆكراینایان تاوتوێ کرد.
کۆبوونەوەکەی ئۆباما و پۆتین تەنیا نیو کاتژمێری خایاند و باسی سەرەکی نوێوانیان قەیرانی سووریا و دۆخی ئۆكراینا بوو. بەپێی سەرچاوەکان لە کۆبوونەوەکەدا ئۆباما بە پۆتینی ڕاگەیاندووە کە: لە چوارچێوەی گواستنەوەی دەسەڵات لە سووریا پێویستە بەشار ئەسەد، سەرۆكی سووریا دەستبەرداری دەسەڵات بێت.
ئۆمابا جەختی لە گەیشتن بە چارەیەكی دیبلۆماسی بۆ پرسی ئۆكراینا كردووەتەوە و باسی لابردنی سزاكانی سەر رووسیا كردووە ئەگەر مۆسكۆ پابەندی رێكەوتنی مینسك بێت.
هاوکات كۆشكی كرێملینی رووسیا رایگەیاند کە: ڤلادیمیر پۆتین و باراک ئۆباما كۆكن لەسەر پشتیوانیكردن بە ئاڕاستەی بەدیهێنانی رێكەوتنی سیاسی لە سووریا.
21 كۆنگرەی گۆڕانی كەش و ھەوا دوێنێ بە بەشداریی سەرۆکان و نوێنەرانی زیاتر لە 150 وڵات لە پایتەختی فەرەنسا دەستیپێکرد.