ھەرێم گرێبەستى گاز لەگەڵ ئێران واژوو دەکات
K24 – ههولێر:
رێواس فایەق، ئەندامێكی ليژنەی سامانە سروشتییەكان لە پەرلەمانی كوردستان ئاشكرای کرد، حكوومەتی ھەرێمی كوردستان ئامادەكاریی دەكات گرێبەستێک لەبارەی گازەوە لەگەڵ ئێران واژوو بکات.
رێواس فایەق بە (كوردستان24)ی رايگەیاند: "حكوومەتی ھەرێمی كوردستان ئامادەكاریی دەكات بۆ ئەوەی ھاوشێوەی توركیا مامەڵە لەگەڵ ئێران بكات و گرێبەستی گازیی لەگەڵدا بكات، ئەمەش گرنگە چونكە نابێت حكوومەتی ھەرێمی كوردستان ھەموو ھێلكەكان بخاتە سەبەتەی یەك وڵات، بەڵكوو دەبێت لە چەند رێگەیەکەوە نەوت و گاز ھەناردە بكات".
هاوکات غالیب محەممەد، سەرۆكی ليژنەی سامانە سروشتییەكان لە ئەنجوومەنی پارێزگای سلێمانی بە (كوردستان24)ی گوت: "دەتوانین بڵێین كوردستان خاوەنی 4% یەدەکی گازە لە جیهان كە زۆربەی دەكەوێتە گەرمیان و سلێمانییە و بەشێكیشی كەوتووتە سنووری پارێزگای ھەولێرەوە".
ھەندێك لە شارەزایانی بواری نەوت و گاز پێیانوایە حكوومەتی ھەرێمی كوردستان لە رووی یاساییە ھیچ كێشەیەكی لە گرێبەست و فرۆشتنی گاز نابێت، بەڵام ترس لەوە ھەیە ئاستەنگی سیاسیی بۆ دروست بكرێت.