رۆژی ئاڵای کوردستان

K24 / وێنە- دژوار ئیبراھیم

ئەمڕۆ رۆژی ئاڵای کوردستانە، ئاڵای کوردستانی فیدڕاڵە و لە تەواوی ئەو ناوچانەی کە لە ژێر دەسەڵاتی حکوومەتی ھەرێمی کوردستاندان لە داموودەزگا حکوومییەکان و ئۆرگانە فەرمییەکان هەڵکراوە.

لە ساڵی 2009 دا پەرلەمانی كوردستان بڕیاریدا رۆژی 17ی مانگی دوازدەی هەموو ساڵێك وەک رۆژی‌ ئاڵای‌ كوردستان دیاری بکات لەسەرجەم شارو شارۆچكەكانی‌ هەرێمی‌ كوردستان.

واتا و هێمای رەنگەکانی ئاڵای کوردستان:

رەنگی سوور: شۆڕش، خوێن رژان لە جەنگ، ئازایی، هێز، یەکسانیی.

رەنگی زەرد: رووناکیی، درەوشانەوە، وریایی، ئاگر.

رەنگی سپی: ئاشتیی، ئارامیی، ئاگربەست.

رەنگی سەوز: سەوزایی، وڵات، پاراستن، لاوێتیی.

ئاڵای کۆماری کوردستان لە مەهاباد 1946

لە سەردەمی دووەم شەڕی جیهانیی و لەگەڵ بەرەوپێشچوونی بزوتنەوەی کورد لە ئێران و پاشانیش راگەیاندن و دامەزراندنی کۆماری کوردستان لە رۆژی 22/1/1946 کە شاری مەهاباد پایتەختی بوو، ئاڵای سەربەخۆیی کوردستان هەڵکرا.