ئێران: پرۆژە یاسای رێگریكردن لە یارمەتیدانی گرووپە تیرۆریستەكان رەتكرایەوە
K24 – تاران:
ئەنجومەنی پاراستنی دەستووری ئێران پرۆژە یاسای رێگەگرتن لە یارمەتیدانی دارایی گرووپە تیرۆریستیەكانی رەتكردەوە، پاساویشی ئەوەیە لە پرۆژەكەدا جیاوازی نێوان تیرۆریست و ئازادیخواز دیاری نەكراوە.
پرۆژەی رێگەگرتن لە یارمەتی دارایی تیرۆریزم لە لایەن حكوومەتی ئێرانەوە ئامادە كرابوو و ئەنجوومەنی شوورای كۆماری ئیسلامی ئێرانێش ئەو پرۆژەیەی پەسند كردبوو، بەڵام ئەمڕۆ لە لایەن ئەنجومەنی پاراستنی دەستووری ئێرانەوە رەتكرایەوە.
ئەنجومەنی پاراستنی دەستوور رایگەیاند: "پرۆژە یاساكە ئەو نەتەوە و گروپ و رێكخراوە ئازادیخوازانەی جیا نەكردۆتەوە، كە شەڕ لە دژی داگیركاران و رەگەزپەرەستان دەكەن. ئەوەش دژی نەریت و بنەما شەرعییەكانی ئیسلامە".
لە پڕۆژە یاساكەدا، یارمەتیدان گرووپ و رێكخراوە تیرۆریستییەكان وەكوو دژایەتی خودا پێناسە كراوە و حوكمی سێدارەی بۆ دیاریكراوە.
چاودێرانیش پێیانوایە، ھۆكاری رەتكردنەوەی ئەو پڕۆژە یاسایە لە لایەن ئەنجوومەنی پاراستنی دەستوورەوە ئەوەیە، كۆماری ئیسلامیی ئێران یارمەتی حزبوڵڵای لوبنان و حەماس لە فەلەستین و حوسییەكانی یەمەن دەدات و كۆمەڵگەی نیودەوڵەتیش ئەو گرووپانە بە تیرۆریست دەزانێت.
پرۆژە یاسای رێگەگرتن لەیارمەتیدانی دارایی تیرۆریزم ساڵی 2011 لەلایەن حكومەتەوە ئامادەكراو و رادەستی ئەنجوومەنی شوورای كۆماری ئیسلامیی ئێران كرا. ئەو پرۆژە یاسایە ماوەی پێنج ساڵە لە نێوان ئەو ئەنجوومەنە و ئەنجومەنی پاراستنی دەستووری ئەو وڵاتەوە دەستاودەستی پێدەكرێت.