ئاشتیی هەورامیی لەبارەی مووچەوە روونکردنەوە دەدات

K24

ئاشتی هەورامیی، وەزیری سامانە سروشتییەکانی حکوومەتی هەرێمی کوردستان رایگەیاند گرێبەستی لەگەڵ هیچ کۆمپانیایەکدا نەکردووە، لەسەر بنەمای ئەوەی بێ و بڵێ بە تەنیا مووچەی فەرمانبەرانی هەرێم دابین دەکات.

پێشتر لە چەند دەزگایەکی راگەیاندن لە هەرێمی کوردستان هەواڵی ئەو بڵاوکرایەوە کە گوایە: یەکێک لەو کۆمپانیانەی بواری نەوت کە لە هەرێمی کوردستاندا کار دەکەن، ئامادەیی خۆی نیشانداوە کە ئەگەر بێت و نرخی نەوت زیاتریش داببەزێ ئەوا ئەو کۆمپانیایە دەتوانێ مووچەی فەرمانبەران دابینبکات و ئێستایش لەگەڵ وەزارەتی سامانە سرووشتییەکان لەم بارەوە گفتوگۆ دەکات.

لەمبارەوە ئاشتی هەورامیی، ئەمڕۆ پێنجشەممە، بە سایتی فەرمیی پارتی دیموکراتی کوردستانی راشیگەیاند: "ئەمە دەنگۆیە و بنەمای نییە، چونکە وەزارەت هیچ گرێبەستێکی پەیوەست بەم پرسە لەگەڵ هیچ کۆمپانیایەکدا نەکردووە".

دوێنێ بریکاری وەزیری دارایی و ئابووریی حکوومەتی هەرێمی کوردستان رایگه‌یاند کە: "حکوومەت مووچەی فەرمانبەران ناکات بە نیوە و دوای بڕیاردان لەسەر پێشنیازەکانی دابەشکردنی مووچە، حکوومەت دەست بە دابەشکردنی مووچە دەکاتەوە".

ئەمە لە کاتێکدایە حکوومەتی هەرێمی کوردستان دەڵێ بەهۆی دابەزینی نرخی نەوتی خاو و تێچووی شەڕی داعش دووچاری قەیرانی دارایی بووەتوە، لە کاتێکدا مووچەی فەرمانبەرانی هەرێمی چەند مانگێکە دواکەوتووە.