خالید عەزیزی: مافی خۆمانە لە رۆژھەڵاتی كوردستان داوای ريفراندۆم بكەین
K24 – كۆیە:
سكرتێری حزبی دیموكراتی كوردستان، خالید عەزیزی رایگەیاند: "ماوەی 70 ساڵە ھەموو شێوازەكانی نەرمیی نواندنمان لەگەڵ كۆماری ئیسلامیی ئێران تاقیكردووەتەوە، بەڵام بەشی ئێمە ھەر ھەڵاواردن، كوشتن و بڕین بووە، بۆیە بە مافی خۆمانی دەزانین داوای ريفراندۆم بكەین".
لە مەراسیمی دەستپێكردنی شازدەیەمین كۆنگرەی حزبی دیموكراتی كوردستاندا، خالید عەزیزی گوتی: "حزبی دیموكرات ھەمیشە بە ھەستكردن بە بەرپرسیارەتییەوە مامەڵەی لەگەڵ بارودۆخەكاندا كردووە و ھەوڵيداوە سەبارەت بە كۆماری ئیسلامیی ئێران نەرمی بنوێنێت و دەیان شێوازی دانوستانمان لەگەڵ دەسەڵاتدارانی كۆماری ئیسلامیی ئێران تاقیكردووەتەوە".
سكرتێری حزبی دیموكراتی كوردستان گوتیشی: "كۆماری ئیسلامیی ئێران نە تەنیا لە دەسەڵاتدا بەشداری بە كورد ناكات، بەردەوام بە كوشتن، بڕین، به سه‌ربازگه كردنی رۆژھەڵاتی كوردستان وەڵامیان داوینەتەوە، سەرەڕای ئەوەی تەنانەت بەرامبەر كۆڵبەرەكانیش بەزەییان نییە و بێ رەحمانە دەیاندەنە بەر دەسترێژی گوله".
خالید عەزیزی ئەوەشی خستەڕوو: "كاتی ئەوە ھاتووە بە كۆمەڵگه‌ی نێودەوڵەتی رابگەیەنين، بەسە ھەڵاواردنی نەتەوەیی و داوای ريفراندۆم لە رۆژھەڵاتی كوردستان بكەین".