توركیا ده‌ستێوه‌ردانان د سنورێن خوه و رۆژئاڤایا كوردستانێ دا دكه
K24 – باشوورى كوردستان
ئه‌نقه‌ره دخازه سنورێن خوه ب رۆژئاڤایێ كوردستانێ ره، بو برۆتۆكۆلا سالا 1939 بزڤرینه
ب درێژاهیا سنورێن كو دكه‌ڤه دناڤبه‌را رۆژئاڤا و باكوورى كوردستانێدا،دگه‌هیته 820 كیلومه‌تران، ژ ده‌ریا سپى ده‌ستپێدكه تاكو دگه‌هیته گوندێ، سێمالكان، ل باژێرێ دێركێ.
ئه‌ف سنوره د په‌یمانا سیڤه‌ر دا ب ئاوایه‌كێ ده‌ستپێكى هات نیشان كرن، د په‌یمانا لۆزان ژى دا گه‌له‌ك گوهاتن ل سه‌ر هاتن كرن، هه‌روه‌ها د چارچوڤێ پرۆتۆكۆلێن كو دناڤبه‌را توركیا و فه‌ره‌نسایێ دا هاتن ئیمزا كرن د سالێن 1920 ، 1926 ، 1929 , 1939.
لگور یه‌كینه‌یێن پاراستنا گه‌ل YPG د چارچوڤه‌یا شه‌رێ سووریایێ ده، گه‌له‌ك جاران توركیا هه‌ول دایه ده‌ستێوه‌ردانێ د ئاخا سووریا و روژئاڤایێ كوردستانێ بكه، ئه‌وژى د رییا گه‌له‌ك پرۆژه‌یان ره، مینا چێكرنا كه‌ریدۆرێن مرۆڤى،سه‌پاندنا نافچه‌یێن دژى فرینێ، ئاڤاكرنا ده‌ڤه‌ره‌كا ئارام دناڤبه‌را كوبانێ و عه‌فرینێ ده، ژبلى ده‌رباز كرنا چه‌كدارێن بیانى داكو هێرشى باژارێن رۆژئاڤایێ كوردستانێ بكه‌ن.
ژ ئالیه‌كێ دن ڤه ئارتیشا توركیایێ، گه‌له‌ك جاران ده‌ستێوه‌ردانا كردارى ژى كریه، مینا ڤه‌گوهاستنا گۆرا، سلێمان شاه، دامه‌زرینه‌رێ سولتانیا عوسمانى ژ ده‌ڤه‌را، قه‌ره‌قۆزاقێ، ل گونده‌وارێن حه‌له‌بێ بو گوندێ، ئاشما، كو نزیكى كوبانێ یه.
هه‌روه‌ها ئارتیشا توركیا ب ده‌هان جاران ناڤه‌ندێن YPG ل سه‌ر سنور تۆب باران كرنه ب تایبه‌تى ل ده‌ڤه‌را گرێ سپى.
ل گۆر یه‌كینه‌یێن پاراستنا گه‌ل YPG، د مه‌ها بوریده جه‌ندرمه‌یێن تورك پێلێن سنور پێشدا برنه دناڤ چه‌ند گوندێن روژئاڤایێ كوردستانێ ده.
ئارتیشا توركیا دبێژه، ئه‌و بنیازه سنورێن خوه ب رۆژئاڤایێ كوردستانێ ره، لگور برۆتۆكۆلێن كو دناڤبه‌را توركیا و فه‌ره‌نسایێ دا ل سالا 1939 هاتین مۆر كرن،سه‌ر راست بكه.
ژبلى ڤێ یه‌كێ، حكومه‌تا توركیێ بنیازه كو دیواره‌كێ درێژ دناڤبه‌را رۆژئاڤا و باكوورێ كوردستانێ دا ئاڤا بكه، تا ریێ ل قاچاغچى و كۆچبه‌ران بگره.
حكومه‌تا توركیێ ئاڤا كرنا هه‌رێمه‌كا كوردى ل رۆژئاڤایێ كوردستانێ ب خێزا سوور بناڤدكه, ژبه‌ر كو ئه‌و وه‌ك مینا گه‌فه‌كێ بو سه‌ر ئه‌وله‌هیا خوه دبینه.