بۆ یەكەمجارە پارتێكی كوردی نێوان دوو ھاوپەیمان لاواز دەكات
K24- ههولێر
توركیا رەخنە لە لێدوانەكانی وەزارەتی دەرەوەی ئەمریكا دەگرێت و بە پێچەوانەی ئەو ھاوپەیمانییە ناوی دەبات كە چەندین ساڵە لەگەڵ ئەمریكا ھەیەتی.
داواش لە ئەمریكا دەكات بەھەمان شێوە و بەیەكسانی سهيرى یەكینەكانی پارستنی گەل (یەپەگە ) و توركیا نەكات.
جۆن كێربی گوتەبێژی وەزارەتی دەرەوەی ئەمریكا، لە لێدوانێكیدا گوتبووی پێویستە توركیا و یەپەگە شەڕ لە دژی دوژمنە ھاوبەشەكەیان كە داعشە، بكەن نەك سەرقاڵی شهڕى يهكتر بن.
توركیا داوا لە ھاوپەیمانەكەی ئەمریكا دەكات پێداچوونەوە لە سیاسەتەكانی یەپەگە بكات و بەیەك چاو تەماشای یەپەگە و توركیا نەكات.
رەخنەش دەگرێت ئەمریكا بەھەمان شێوە مامەڵەی لەگەڵ توركیا و یەپەگە كردووە.
تانژو بیلگیچ گوتەبێژی وەزارەتی دەرەوەی توركیا رايگهياند: "ئێمە پەشۆكاین بەو لێدوانەی جۆن كێربی گوتەبێژی وەزارەتی دەرەوەی ئەمریكا كە ئامۆژگاری ئێمە و یەپەگە دەكات و دەمانھێنێتە ریزی ئەو رێكخراوە تیرۆریستیە، لە كاتێكدا توركیا ھاوپەیمانی ئەمریكایە و چەندین ساڵە بەدەست تیرۆرزمەوە دەناڵێنێت، ئێمە پێویستمان بە مۆڵەتدان نییە بۆ شەڕكردن لە دژی یەپەگە، شەڕی ئێمە لە دژی تیرۆریستان بەردەوام دەبێت".
پێشتر ئەحمەد داودئۆغلو سەرۆك وەزیری توركیا رايگهياند بوو: "ئەگەر چەكدارانی یەپەگە نزیكی شارۆچكەی عەزاز بكەونەوە ئەوە رووبەڕووی گەورەترین ھێرش دەبنەوە، ئەو بنكە ئاسمانییەی لە شارۆچكەكەدایە ناھێڵین داگیربكرێت، ھەروەھا ئەگەر بوردوومانی توركیا نەبووایە ئەوە شارۆچكەی عەزاز و تەل رەفعەت دەكەوتە ژێر دەستی یەپەگە، داوامان كردووە یەپەگە لە عەفرین و رۆژئاوای ڕووباری فورات نزیك نەكەوێتەوە".
چەند رۆژێکە تۆپخانەکانی تورکیا، دەستیان بەبۆردومانکردنی ناوچە سنوورییهکانی توركیا له ناو خاكی رۆژئاوای كوردستان كردووه، کە ھەفتەیەك پێش ئێستا شەڕڤانانی یەپەگە کۆنتڕۆڵیان کردووه.