نرخی نەوت دابەزی

K24- هەولێر

نرخی نەوتی خاو لە بازاڕەکانی جیهان، ئەمڕۆ پێنجشەممە، بەهۆی زیادبوونی ئاستی نەوتی خاوی ئەمبارکراوی ویلایەتە یەکگرتووەکانی ئەمریکا، دابەزی.

بەپێی ئاژانسی رۆیتەرز، نرخی بەرمیلێک نەوتی جۆری برێنت کە پێوەرێکی جیهانییە بۆ باشترین جۆری نەوتی خاو، لە گرێبەستە پێشوەختەکاندا، ئەمڕۆ گەیشتە 37.17 دۆلاری ئەمریکی، بەڵام دواتر پاشەکشێی کرد و بۆ 36.67 دۆلار بۆ هەر بەرمیلێک دابەزی.

هاوکات نرخی نەوتی خاوی ئەمریکا لە گرێبەستە پێشوەختەکاندا، ئەمڕۆ گەیشتە 34.88 دۆلار بۆ هەر بەرمیلێک. بەڵام نەوتی خاوی ئەمبارکراوی ویلایەتە یەکگرتووەکانی ئەمریکا، هەفتەی رابردوو، ئاستێکی پێوانەیی تۆمار کرد و گەیشتە 517.98 ملیۆن بەرمیل.

هۆکاری بەرزبوونی قەبارەی نەوتی خاوی ئەمبارکراوی ئەمریکا هاوکاتە لەگەڵ زیادبوونی نەوت لە بازاڕە جیهانییەکان کە گەیشتووەتە نێوان ملیۆنێک بۆ دوو ملیۆن بەرمیل زیاد لە پێویستی بازاڕ لە رۆژێکدا، ئەمەش  لە ناوەڕاستی ساڵی 2014 بووە هۆی دابەزینی نرخی نەوت بە رێژەی 70%.

ئەمە لە کاتێکدایە وڵاتانی سعودییە و رووسیا و قەتەر و فەنزوێلا پێشتر رێککەوتن لەسەر سڕکردنی ئاستی هەناردەکردنی نەوت بۆ بازاڕەکانی جیهان وەک هەوڵێک بۆ بەرزکردنەوەی نرخی نەوت.

هاوکات بەهۆی دابەزینی نرخی نەوتەوە لە بازاڕەکانی جیهان هەرێمی کوردستان و عێراق دووچاری قەیرانی دارایی بوونەتەوە، لە کاتێکدایە هەردوولا بە رێژەی نزیکەی 90% پشت بە داهاتی نەوتەوە دەبەستن بۆ دابینکردنی خەرجییەکانیان.

سەرچاوە: رۆیتەرز، ئا: ئا ، ف