سعودییە: له‌ سووریا هیچ داهاتوویه‌ك بۆ به‌شار ئه‌سه‌د نییه‌

"سعودییه‌ و فه‌ره‌نسا پیشتیوانیی خۆیان بۆ ئاگربه‌ست له‌ سووریا ده‌ربڕیوه"‌

K24 - ھەولێر:

وه‌زیری ده‌ره‌وه‌ی سعودییه‌ ده‌ڵێت ریاز و پاریس له‌ سه‌ر دۆسییه‌كانی رۆژهه‌ڵاتی ناوه‌ڕاست هاوڕان و له‌ سووریادا، هیچ داهاتوویه‌ك بۆ به‌شار ئه‌سه‌د نییه‌.

شازاده‌ محه‌ممه‌د نایف دوینێ سەردانی فەرەنسایكرد، لەگەڵ ھەریەكە لە فرانسوا ئۆلاند سه‌رۆكی فەرەنسا و مانوێل ڤالس سه‌رۆك وه‌زیرانی فه‌ره‌نسا كۆبووەوە، لەمبارەیەوە عادل جوبه‌یر وەزیری دەرەوەی سعودییە ده‌ڵێت:  "ریاز و پاریس له‌ زۆربه‌ی بابه‌ت و پرسه‌كانی رۆژهه‌ڵاتی ناوه‌ڕاست هاوڕان، به‌تایبه‌تی له‌سه‌ر پرسی عێراق و سووریا، ده‌ستێوه‌ردانه‌كانی ئێران له‌ كاروباری ناوچه‌كه‌ و دۆسیه‌ی یه‌مه‌ن و لیبیا و به‌ره‌نگاربوونه‌وه‌ی تیرۆر".

عادل جوبه‌یر به‌ ئاژانسی هه‌واڵی فه‌رمی وڵاته‌كه‌ی راگه‌یاندووه‌،  سعودییه‌ و فه‌ره‌نسا پیشتیوانی خۆیان بۆ رێككه‌وتنی ئاگربه‌ست له‌ سووریه‌ ده‌ربڕیوه و له‌سه‌ر گواستنه‌وه‌ی ده‌سه‌ڵاتی سیاسییش له‌و وڵاته‌ هاوڕان به‌گوێره‌ی بنه‌ماكانی كۆنگره‌ی جنێڤ دوو، چونكه‌ له‌ سووریادا، هیچ داهاتوویه‌ك بۆ به‌شار ئه‌سه‌د نییه‌.

ماوەی 5 ساڵە شەڕی نێوخۆ لە سووریا دەستیپێكردووە، بەگوێرەی ئامارەكانی رووانگەی سووریا بۆ مافەكانی مرۆڤ لە دەستپێكی شەڕ و ئاڵۆزییەكان تا ئێستا نزیكەی 270 ھەزار كەس كوژراون.

ھەریەك لە ئێران و سعودییە یەكتر تۆمەتباردەكەن بە دەستتێوەردانی سووریا.

  سەرچاوە: AFP   داڕشتنەوە: ش، م