پارتی و یەكێتی پرسی كاراكردنەوەی پەرلەمان تاوتوێ دەكەن
K24 - ھەولێر:
لیژنەی ھاوبەشی پارتی دیموكراتی كوردستان و یەكێتی نیشتمانی كوردستان لە شاری ھەولێر پرسی كاراكردنەوەی پەرلەمانی كوردستان تاوتوێ دەكەن.
پەیامنێری (كوردستان24) رایگەیاند: "لیژنەی ھاوبەشی پارتی دیموكراتی كوردستان و یەكێتی نیشتمانی كوردستان بۆ كاراكردنەوە پەرلەمانی كوردستان لە ھەولێر لە كۆبوونەوەدان و تاوتوێی كاراكردنەوەی پەرلەمان دەكەن".
گوتیشی: "پلانی كۆبوونەوەكەی ئەمڕۆی لیژنەی ھابەشی پارتی و یەكێتی ئەوەیە كە چۆن لەسەر لەسەر گەڕانەوەی سەرۆكی پەرلەمان رێك بكەون، دەیانەوێت نێوان خۆیاندا لەسەر ئەو بابەتە رێكدەكەون، دواتر چۆن لەگەڵ بزوتنەوەی گۆڕان و لایەنە سیاسییەكانی دیكە لەسەر پرسی كاراكردنەوەی پەرلەمان و كێشەكانی دیكەی نێوان لایەنە سیاسییەكان گفتوگۆ بكەن".
ئاماژەی بۆ ئەوەشكرد: "لە كۆبوونەوەی رابردووی مەكتەبی سیاسی پارتی و یەكێتی بە سەرۆكایەتی مەسعوود بارزانی سەرۆكی ھەرێمی كوردستان و سەرۆكی پارتی دیموكراتی كوردستان، بڕیار لەسەر ئەو پێكھێنانی ئەو لیژنە ھاوبەشە دراوە".
كۆبوونەوەی پارتی دیموكراتی كوردستان و یەكێتی نیشتمانی كوردستان لە ھەولێر كاتێكدا كە ھاوكات ئەمڕۆ جڤاتی بزوتنەوەی گۆڕان لە گردی سلێمانی لە كۆبوونەوەدان چاوەڕوان دەكرێت لەسەر پرسی كاراكردنەوەی پەرلەمان ھەڵوێستی نوێ رابگەیەنن.