ئهمریكا و كۆریای باشوور مانۆڕی سهربازیی بهڕێوه دهبهن
K24 – ههولێر:
بێچووی ھەڵۆ، ئەمە ناوی ئەو مانۆڕە سەربازییە ھاوبەشەی نێوان ئەمریکا و کۆریای باشوورە کە ساڵانە بۆ بەھێز کردنی توانا سەربازییەکانیان و نمایشکردنی ھێزی سەربازیان ئەنجامی دەدەن.
ئەمساڵ بە بەشداری ٣١٧٠٠٠ سەربازی ئەو دوو وڵاتە گەورەترین مانۆری سەربازی ئەنجامدرا.
مانۆرەکە ماوەی ٥٣ رۆژ بەردەوام دەبێت لە ٨ی ئەم مانگەوە دەستی پێکردوە و تا ٣٠ مانگی داھاتوو بەردەوام دەبێت.
جەیسن جێنسن، فەرماندەی ھێزە دەریاییەکانی ئەمریکا لە کۆریای باشوور، ئامانجی مانۆرەکەی ئاشکرا کرد و گوتی: "ئێمە پێمانوایە راھێنانی ھاوبەش، بەھێزمان دەکات، بەدڵنیاییەوە ھەبوونی ھێزێکی ھاوبەش و کاریگەر سەقامگیریی نیمچهدوورگەی کۆریا مسۆگەر دەکات، نە تەنھا بۆ ئەم ناوچەیە بەڵکو ئم مانۆڕە دڵنیایی تەواو دەداتە خەڵکی کۆریای باشوور."
ئهو مانۆڕە سەربازییە کاردانەوەی کۆریای باکووری بەدوای خۆیدا ھێنا و رایگەیاند: "ئەگەر مانۆرە سەربازییەکەی ئەمریکا و کۆریای باشوور درێژه بکێشێت حکوومەتی پیۆنگ یانگ ئامادەیە وەڵامیان بداتەوە".
لەلایەکی دیکەوە رووسیا و چین رەخنەیان لە سیستەمی دژه مووشەکی بالیستی گرت کە ئەمریکا لە مانۆڕەکەدا نمایشی کردووە.
لهوبارهیهوه وانگ یی، وەزیری دەرەوەی چین گوتی: "" تێبینیی خۆمان ھەیە لەسەر ھێنانی سیستەمی دژی مووشەکی بالیستی، لە مەترسییەکانی کۆریای باکوور و ئامادەکارییەکانی کۆریای باشوور باش تێدەگەین بەڵام وەک چین و روسیا دژی ھێنانی سیستەمی دژه مووشەکی بالیستین لەلایەن ئەمریکاوە بۆ ناوچەکە چونکە پلانی ستراتیژیی ئەمنی چین و رووسیا و بارودۆخی ناوچەکە زیاتر تێکدەدات."
دوای تاقیکردنەوەی بۆمبی ھایدرۆجینی لەلایەن کۆریای باکوور و سەپاندنی سزا بەسەر ئەو وڵاتەدا لەلایەن ئەنجومەنی ئاسایشی نێودەوڵەتییەوە بارودۆخی نیمچهدوورگەی کۆریا زیاتر ئاڵۆز بووە.