زانكۆی ئەمریكی لە دھۆك دەكرێتەوە
K24 - دھۆك:
بڕیارە ئەمڕۆ بە ئامادەبوونی ژمارەیەك لە بەرپرسانی باڵای ھەرێمی كوردستان و نوێنەر و كۆنسڵی وڵاتانی بیانی لە ھەرێمی كوردستان لە مەراسیمێكدا زانكۆی ئەمریكی لە دھۆك بكرێتەوە.
پەیامنێری (كوردستان24) لە دھۆك رایگەیاند: "ئەمڕۆ زانكۆی ئەمریكی لە شاری دھۆك دەكرێتەوە و ئامادەكاری تەواو كراوە".
لە لێدوانێكدا بۆ (كوردستان24) ھونەر خۆشەوی، ئەندامی دەستەی زانكۆی ئەمریكی لە دھۆك رایگەیاند: "وەك سەرەتا پێنج بەش لەم زانكۆیە دەكرێنەوە، ئەوانیش ھەر یەك لە بەشەكانی دیزاین، زانستەكانی كۆمپیوتەر، ئیدارە و ئابووریی، رۆژنامەوانی، ھەروەھا بەشی سیاسی و سیاسەتی كۆمەڵایەتی".
گوتیشی: "ھەندێك بەش لەو زانكۆیەدا ھەن لە ھیچ زانكۆیەكی دیكەی كوردستان نین، بۆیە كردنەوەی ئەو زانكۆیەكی گرنگی خۆی ھەیە و ئامانجمان نییە تەنھا قوتابی بێت و دەرچێت، بەڵكو مەبەستمانە قوتابیان ببنە رێبەر".
باسی لەوەشكرد: "ئەو زانكۆیە پەیوەندییەكی باشی لەگەڵ زانكۆكانی ئەمریكا دەبێت، خوێندن لەم زانكۆیە كوالیتی بەرزی دەبێت بە جۆرێك كە قوتابی قۆناغی دووەم لێرە بخوێنێت دەتوانێت قۆناغی سێیەم بچێت لە ئەمریكا بخوێنێت"