ده‌نگۆى ده‌ستله‌كاركێشانه‌ى عه‌بادى له ئارادايه
K24 – هه‌ولێر:
عه‌بادى له‌به‌رده‌م فشاره‌كانى ئه‌نجوومه‌نى نوێنه‌ران له لايه‌ك و ناڕه‌زايه‌تى شه‌قامى عێراقى له لايه‌كى ديكه‌وه‌يه و ده‌نگۆى ئه‌وه‌ش له ئارادايه عه‌بادى ده‌ستله‌كار بكێشێته‌وه.
په‌يامنێرى كوردستان 24، له هۆڵى ميديايى ئه‌نجوومه‌نى نوێنه‌رانى عێراق، رايگه‌ياند، كه‌سايه‌تى و سه‌رچاوه نزيكه‌كانى سه‌رۆك وه‌زيرانى عێراق حه‌يده‌ر عه‌بادى، پێشبينى ئه‌وه ده‌كه‌ن، عه‌بادى ده‌ست له حزبى ده‌عوه‌ى ئيسلامى بكێشێته‌وه و وه‌ك كه‌سايه‌تييه‌كى سياسى ئه‌كاديمى بيه‌وێت سه‌رۆكايه‌تى كابينه‌ى داهاتووى حكومه‌ت بكات.
ئه‌مڕۆ، سه‌رۆك وه‌زيرانى عێراق، حه‌يده‌ر عه‌بادى، گه‌يشته ئه‌نجوومه‌نى نوێنه‌ران و له‌گه‌ڵ ده‌سته‌ى سه‌رۆكايه‌تى ئه‌نجوومه‌نى نوێنه‌ران كۆبوويه‌وه.
په‌يامنێرى كوردستان 24 له ئه‌نجوومه‌نى نوێنه‌ران، رايگه‌ياند، له ئێستادا كۆبوونه‌وه‌ى نێوان عه‌بادى و ده‌سته‌ى سه‌رۆكايه‌تى ئه‌نجوومه‌نى نوێنه‌ران به‌رده‌وامه.
روونيشيكرده‌وه، كوتله‌ى حه‌ل له دانيشتنى چاوه‌ڕوانكراوى ئه‌نجوومه‌نى نوێنه‌ران كشاوه‌ته‌وه.
هه‌روه‌ها ئاماژه‌ى بۆ ئه‌وه‌شكرد، نووسينگه‌ى راگه‌ياندنى سه‌رۆك وه‌زيرانى عێراق ئاشكرايكردووه، كه ناوى ليستێك له‌و وه‌زاره‌تانه‌ى عه‌بادى ده‌يه‌وێت بيانگۆڕێت ده‌داته ده‌ست سه‌رۆكايه‌تى ئه‌نجوومه‌نى نوێنه‌ران.
ئه‌مڕۆ 285 نوێنه‌ر له كۆى 325 به‌شدارييان له دانيشتنى ئه‌نجوومه‌نى نوێنه‌راندا كردووه.
ره‌وشى به‌غدا له حاڵه‌تى چاوه‌ڕوانيدايه و له لايه‌كه‌وه خۆپيشاندانى سه‌درييه‌كان به‌رده‌وامه و له لايه‌كى ديكه‌وه عێراق به گۆڕانكارى سياسييدا تێپه‌ڕده‌بێت و به‌و هۆيه‌وه ئه‌مڕۆ سه‌رجه‌م ده‌روازه‌كانى ناوچه‌ى سه‌وز داخران.
به گوێره‌ى زانيارييه ميدياييه‌كان، له به‌ره‌به‌يانى ئه‌مڕۆوه هێزه ئه‌منييه‌كانى عێراق له به‌غداى پايته‌خت بڵاوبوونه‌ته‌وه و سه‌رجه‌م ئه‌و رێگايانه‌ى ده‌چنه‌وه سه‌ر ناوچه‌ى سه‌وز داخراون.
ئه‌مڕۆ ئه‌نجوومه‌نى نوێنه‌ران دانيشتنى ژماره 21ى ئه‌م خوله‌ى خۆى ده‌ستپێكرد، كه تايبه‌ته به ئاماده‌بوونى سه‌رۆك وه‌زيرانى عێراق حه‌يده‌ر عه‌بادى له دانيشتنه‌كه و راگه‌ياندنى چاكسازييه‌كان.
.jpg)
