رێكارەكانی دابەشكردنی زەوی بەسەر كرێنشینان تەواو بووە
K24 - ھەولێر:
وەزیری شارەوانی و گەشتوگوزاری حكوومەتی ھەرێمی كوردستان رایگەیاند، رێكارەكانی دابەشكردنی پارچە زەوی بەسەر كرێنشین و كەمدەرامەتان تەواو بووە و ئامادەیە بۆ جێبەجێكردنی بڕیارەكە.
لە لێدوانێكدا بۆ (كوردستان24) نەورۆز مەلود، وەزیری شارەوانی و گەشتوگوزاری حكوومەتی ھەرێمی كوردستان رایگەیاند: "لەسەر بڕیاری ئەنجوومەنی وەزیران ھەڵساین بە ئامادەكردنی داتاكانی ئەو فەرمانبەر و كرێنشینانەی كە تا ئێستا لە رووی نیشتەجێبوونەوە سوودمەند نەبوونە لە حكوومەت، ئێستا ھەموو ئامارەكان ئامادەیە لە ئەنجوومەنی وەزیران دانراوە بۆ دەستپێكردن و جێبەجێكردنی بڕیارەكە".
وەزیری شارەوانی لەبارەی سوودمەندبوونی خاوەن پێداویستییە تایبەتەكان گوتی: "خاوەن پێداویستیەكان ئەولەویەتیان ھەیە لە پێدانی زەوی بۆ ئەوانەی كە پێشتر سوودمەند نەبوونە و موڵكیان بە ناو نییە، بۆ ئەم مەبەستە لەگەڵ وەزارەتی كارو كاروباری كۆمەڵایەتی ھەماھەنگیمان كردووە و ھەموو داتاكانمان بە دەست گەیشتوون و ئامادەن بۆ دابەشكردنی پارچە زەوی".