ھاوپەیمانێتیەكی دیكە دژ بە داعش دروستكرا
K24 – ھەولێر:
كۆمەڵگای نێودەوڵەتی ھاوپەیمانێتییەكی نوێیان پێكھێناوە بۆ پاراستنی ژێرخانی ئاو و بەرپەچدانەوەی ھەر ھەڕەشەیەك لە داھاتوودا رێكخراوی داعش و قاعیدە و چەندانی دیكە ئەنجامی بدەن.
كێڤن دۆنگان جێگری فەرماندەی دەریاوانی ئەمریكی گوتی: "بڕاوامان وایە ھەڕەشە لەلایەن تیرۆریستان بۆ سەر بارزگانی نێودەوڵەتی بوونی ھەیە، لە ریگەی ئەو جۆرە راھێنانە سەربازییانەوە دەتوانین ئەو ھەڕەشانە كەم بكەینەوە رێكخراوی قاعیدە و داعش و حوسییەكان بەمەترسی دادەنێین، ئێمە دەمانەوێت ئاسایش و ژێرخانی بەرگریی دەریایی لە دژی ئەو ھەڕەشانە بەھێزتر بكەین".
ولیام وارندەر بەرپرسی باڵای دەریاوانی بەریتانیا گوتی: " ھەڕەشەی جۆراوجۆر لە گرووپی بچووك لە ھەرێمەكە بۆ سەر كەشتی و شێوازەكانی دیكەی بازرگانیكردن ھەبووە، لە رێگەی بۆمب و ھێرشكردن بە فڕۆكە ویستوویانە ئابووریی جیھان ناجێگیر بكەن، بۆیە كۆمەڵگای نێودەوڵەتی نیگەرانە و ھاوپەیمانییەك بۆ ئەو مەبەستە پێكھاتووە و راھێنانی دەریاوانی ئەنجامدەدەین".
مەودای ئۆپەراسیۆنەكانی ئەم ھاوپەیمانێتییە، لە ھەریەك لە كەنداوی سوێس و گەرووی بابل مەندەب و كەنداوی عەدەن و عومان و كەنداوی عەرەبی بەگشتی دەگرێتەوە.
تادێی پەیوەندی نێوان ئێران و وڵاتانی كەنداو بەرەو خراپتر دەچێت، بەتایبەت دوای شەڕی حوسییەكانی یەمەن و حكوومەتی وڵاتەكە، بۆیە بوونی ھێزێكی دەریایی لە رۆژھەڵاتی ناوەڕاست ئارامی بە وڵاتانی كەنداو دەبەخشێت، ئەمە جگە لە شەڕكردن لە دژی چەتەی دەریا و بەشداریكردن لە ھەموو جۆرە پوچەڵكردنەوەیەكی مین لە دەریادا.