نرخی نەوت دابەزی
K24-هەولێر
نرخی نەوتی خاو ئەمڕۆ دووشەممە لە بازاڕەکانی جیهان بە شێوەیەکی بەرچاو دابەزی بەهۆی لاوازبوونی ئەگەرەکانی جێگریکردنی بەرهەمهێنانی نەوت لە لایەن وڵاتانی گەورە بەرهەمهێنەری نەوتەوە.
بەپێی ئاژانسی هەواڵنێری رۆیتەرز نرخی بەرمیلێکی نەوتی خاوی جۆری ئاستی پێوەری برێنت ئەمڕۆ لە بازاڕەکانی جیهان بە بڕی 26 سەنت دابەزی و گەیشتە 41.82 دۆلاری ئەمریکی لە کاتێکدا هەفتەی رابردوو نرخی نەوتی خاو بە شێوەیەکی بەرچاو بەرزبوویەوە.
هاوکات نرخی بەرمیلێک نەوتی خاوی ئەمریکا بۆ 39.50 دۆلار دابەزی.
ئەمە لە کاتێکدایە پسپۆرانی کەرتی نەوت لە چەند سەنتەرێکی هەڵسەنگاندن و توێژینەوە هاوشێوەی گوڵدمان ساكس، دەڵێن: دابەزینی نرخی نەوت بەهۆی لاوازبوونی ئەگەرەکانی جێگریکردنی بەرهەمهێنانی نەوت لە لایەن وڵاتانی گەورە بەرهەمهێنەری نەوت کە بڕیارە لە رێکەوتی 17 ئەم مانگە لە وڵاتی قەتەر کۆببنەوە بۆ تاوتوێکردنی جێگیرکردنی ئاستی بەرهەمهێنانی نەوت.
هەر یەک لە رووسیا و سعوودییە پێشەنگی ئەو وڵاتانەن کە بڕیارە لە قەتەر کۆببنەوە. لە کاتێکدا بەپێی سەرچاوەکان ئێستا قەبارەی نەوتی زیادە لە بازاڕەکانی جیهان رۆژانە دەگاتە نزیکەی دوو ملیۆن بەرمیل.
ئا: ئا ، ف