نرخی نەوت رووی لە بەرزبوونە
K24-هەولێر
نرخی نەوتی خاو ئەمڕۆ سێشەممە لە گرێبەستە پێشوەختەکانی فڕۆشتنی نەوت لە بازاڕەکانی جیهان رووی لە بەرزبوونە و نرخی بەرمیلێک نەوتی خاوی پێوەری برێنت گەیشتە 43.39 دۆلاری ئەمریکی و بەردەوام دەگۆڕێ.
بەپێی ئاژانسەکانی جیهان نرخی نەوتی خاوی رۆژئاوای تێکساسی ئەمریکاش ئەمڕۆ رووی لە بەرزبوونە و گەیشتووەتە 40.77 دۆلار.
ئەمە لە کاتێکدایە بڕیارە وڵاتانی گەورە بەرهەمهێنەری نەوت (سعوودییە و رووسیا و چەند وڵاتێکی دیکە) هەفتەی داهاتوو لە وڵاتی قەتەر کۆببنەوە بۆ تاوتوێکردنی جێگیرکردنی ئاستی بەرهەمهێنانی نەوت لە لایەن ئەو وڵاتانەی کە لە کۆبوونەوەکە بەشدار دەبن بە مەبەستی بەرزکردنەوەی نرخی نەوتی خاو.
هاوکات وەزیری وزەی جەزائیر سەڵاح خەبری رایگەیاند نرخی بەرمیلێک نەوت لە دەوروبەری 40 دۆلار جێگیر دەبێ ئەگەر بەرهەمهێنەرانی نەوت چی ئەندامانی رێکخراوی ئۆپیک بن یان نا، لە کۆبوونەوەیکەیان لە قەتەر رێککەوتن لەسەر جێگیرکردنی ئاستی بەرهەمهێنانی نەوت.
بەپێی چاودێرانی بواری نەوت لە جیهان ئێستا زیاتر لە دوو ملیۆن بەرمیل نەوتی خاو زیاد لە پێویست رۆژانە لە بازاڕەکانی جیهاندا هەیە و ئەمە وای کردووە نرخی نەوتی خاو بەرزنەبێتەوە.
ئا: ئا ، ف