نرخی نەوت ئاستێکی پێوانەیی تۆمار کرد
K24-هەولێر
نرخی نەوتی خاو ئەمڕۆ سێشەممە لە گرێبەستە پێشوەختەکانی فڕۆشتنی نەوت لە بازاڕەکانی جیهان رووی لە بەرزبوونە و نرخی بەرمیلێک نەوتی خاوی پێوەری برێنت گەیشتە 44.03 دۆلاری ئەمریکی و بەردەوام دەگۆڕێ.
بەپێی ئاژانسەکانی جیهان نرخی نەوتی خاوی رۆژئاوای تێکساسی ئەمریکاش ئەمڕۆ رووی لە بەرزبوونە و گەیشتووەتە 41.52 دۆلار.
ئەمە لە کاتێکدایە چەند رۆژێکە نرخی نەوت رووی لە بەرزبوونە و ئاستی پێوانەیی تۆمار دەکات دوای ئەوەی ئاژانسی تاسی رووسیا رایگەیاند کە وەزیری وزەی رووسیا ئەلیکسەندەر نۆڤاک لەگەڵ هاوتا سعوودییەیەکی عەلی ئەلنوعەیمی گەیشتوونەتە رێککەوتنێک لەبارەی جێگیرکردنی ئاستی بەرهەمهێنانی نەوت لەو دوو وڵاتە.
بڕیارە وڵاتانی گەورە بەرهەمهێنەری نەوت (سعوودییە و رووسیا و چەند وڵاتێکی دیکە) هەفتەی داهاتوو لە وڵاتی قەتەر کۆببنەوە بۆ تاوتوێکردنی جێگیرکردنی ئاستی بەرهەمهێنانی نەوت لە لایەن ئەو وڵاتانەی کە لە کۆبوونەوەکە بەشدار دەبن بە مەبەستی بەرزکردنەوەی نرخی نەوتی خاو.
بەپێی چاودێرانی بواری نەوت لە جیهان ئێستا زیاتر لە دوو ملیۆن بەرمیل نەوتی خاو زیاد لە پێویست رۆژانە لە بازاڕەکانی جیهاندا هەیە و ئەمە وای کردووە نرخی نەوتی خاو بەرزنەبێتەوە.
ئا: ئا ، ف