نرخی نەوت پاشەکشێ دەکات
K24-هەولێر
نرخی نەوتی خاو لە بازاڕەکانی جیهان وا دوو رۆژە رووی لە دابەزینە دوای ئەوەی بۆ چەند رۆژێک ئاستێکی پێوانەیی تۆمار کرد و بەرمیلێکی گەیشتە سەرووی 44 دۆلار، کە بۆ یەکەم جارە لە ساڵی 2016 تۆماری دەکات.
بەپێی سایتی ئۆیڵ پرایس نرخی بەرمیلێک نەوتی خاوی جۆری پێوەری برێنت ئەمڕۆ لە بازاڕەکانی جیهان دابەزی و گەیشتە 43.10 دۆلاری ئەمریکی. هاوکات نرخی بەرمیلێک نەوتی خاوی ئەمریکا دابەزی و گەیشتە 40.36 دۆلار.
شرۆڤەکاران هۆکاری دابەزینی نرخی نەوت بۆ لاوازبوونی پێشبینییەکان دەگەڕێننەوە لەبارەی کۆبوونەوەی وڵاتانی گەورە هەناردەکاری نەوت، کە بڕیارە سبەی لە وڵاتی قەتەر بەڕێوەبچێت و تێیدا رووسیا و سعوودییە و عێراق و چەند وڵاتێکی دیکەی هەناردەکاری نەوت پرسی جێگیرکردنی ئاستی بەرهەمهێنانی نەوت تاوتوێ بکەن بۆ بەرزکردنەوەی نرخی نەوت.
ئەمە لە کاتێکدایە بەپێی سەنتەرە جیهانییەکانی چاودێریکردنی بازاڕی نەوت، ئێستا زیاتر لە دوو ملیۆن بەرمیل نەوتی خاوی زیاد لە پێویست لە بازاڕەکاندا هەیە و بووەتە هۆی دابەزینی نرخی نەوت بە شێوەیەک لە ناوەڕاستی ساڵی 2014 وە تا ئێستا نەوت نزیکەی 70% بەهای خۆی لەدەستداوە.
ئا: ئا ، ف