ئاگر لە بازاڕێكی ھەولێر كەوتەوە
K24 - ھەولێر:
ئەمڕۆ ئاگرێك لە بازاڕی نیشتمان لە شاری ھەولێر كەوتەوە، بەوھۆیەوە زیانی مادی بەر چەند دوكاندارێك كەوتووە.
پەیامنێری (كوردستان24) لە ھەولێر رایگەیاند: "لە بازاڕی نیشتیمان لە ھەولێر ئاگر لە دوكانێك كەوتووەتەوە و زیانی مادی بەو دوكانە و بە چەند دوكانێك دیكەش كەوتووە".
بە گوتەی دوكاندارانی بازاڕی نیشتیمان: "سەرەتا رووداوی ئاگر كەوتنەوەكە لە دوكانێك بووە و دواتر دوكانە نزیكەكانیش ئاگریان گرتووە، گومان دەكرێت ھۆكاری ئاگركەوتنەوەكە لە شۆڕتی كارەبایی بووبێت".
رایانگەیاند: "دوای رووداوەكە تیمەكانی ئاگركوژێنەوەی بەرگری شارستانی گەیشتنە شوێنی رووداوەكە و ئاگرەكەیان كۆنتڕۆڵ كرد".
دوكاندارانی بازاڕی نیشتمان ئەوەش دەخەنەروو: "خۆشبەختانە رووداوی ئاگركەوتنەوەكە زیانی گیانی بەدواوە نەبوو، چەند كەسێك بەھۆی دوكەڵەوە باری تەندروستیان تێكچوو گەیاندرانە نەخۆشخانە و ئێستا باری تەندروستی ھەموویان جێگیرە".
باسیان لەوەشكرد: "ئەو دوكانەی كە ئاگرەكەی لێكەوتەوە زیانی مادی زۆری بەركەوتووە".