نرخی نەوت بەرزبوویەوە

K24-هەولێر

نرخی نەوتی خاو ئەمڕۆ لە بازاڕەکانی جیهان دیسان بەرزبوویەوە بە شێوەیەک نرخی بەرمیلێک نەوتی خاوی جۆری پێوەری برێنت لە بازاڕەکان گەیشتە سەرووی 43 دۆلاری ئەمریکی.

بەپێی بۆرسەی جیهانیی نرخی بەرمیلێک نەوتی خاوی جۆری پێوەری برێنت ئەمڕۆ لە بازاڕەکاندا گەیشتە 43.27 دۆلار و بەردەوام لە گۆڕاندایە.

هاوکات نرخی بەرمیلێک نەوتی خاوی ئەمریکا ئەمڕۆ گەیشتە 40.18 دۆلار.

ئەمە لە کاتێکدایە هەفتەی رابردوو نرخی نەوت ئاستێکی پێوانەیی تۆمار کرد کە لە ساڵی 2016 دا تۆماری نەکردبوو و گەیشتە سەرووی 44 دۆلار.

بەرزبوونەوەی نرخی نەوت هاوکاتە لەگەڵ مانگرتنی کارمەندانی کەرتی نەوت لە کوێت کە یەکێکە لە وڵاتانی هەناردەکاری نەوت و بەهۆی مانگرتنەوە 60%ی بەرهەمی نەوتی کەمیکردووە.

بەڵام بە بۆچوونی شرۆڤەکارانی کەرتی نەوت و سەنتەرەکانی توێژینەوە و چاودێریکردنی بازاڕەکانی نەوت پێشبینیی ناکرێت لە ساڵی 2016 نرخی بەرمیلێک نەوتی خاو بگاتە سەرووی 50 دۆلار، ئەمەش بەو واتایەیە کە ئەو قەیرانەی رووی لە وڵاتانی هەناردەکاری نەوت کردووە بەم نزیکانە کۆتایی نایەت.

بەهۆی دابەزینی نرخی نەوت کە لە ناوەڕاستی ساڵی 2014 وە تا ئێستا نزیکەی 70% بەهای خۆی لە دەستداوە هەرێمی کوردستان و وڵاتانی هەناردەکاری نەوت دووچاری قەیرانی دارایی و ئابووریی بوونەتەوە، بۆیە چاودێران دەڵێن باشتر وایە بۆ وڵاتانی هەناردەکاری نەوت لە بیر لە دابینکردنی سەرچاوەی دیکەی داهات بکەنە بۆ دابینکردنی قەرجییەکانیان.

ئا: ئا ، ف