پەرله‌مانتارە مانگرتووەكان: خاڵەكانی سەرۆك كۆمار لەگەڵ پەیڕەوی ناوخۆی پەرلەمان ناگونجێن
K24 - بەغدا:
پەرلەمانتارە مانگرتووەكانی عێراق رایانگەیاند، فوئاد مەعسووم سەرۆك كۆماری عێراق كۆمەڵێك خاڵی بۆ ناردوون و ھەوڵەكانی بەرز دەنرخێنن، بەڵام خاڵەكانی لەگەڵ پەیڕەوی ناوخۆی پەرلەماندا ناگونجێن.
لە بەیاننامەیەكدا پەرلەمانتارانی مانگرتووی پەرلەمانی عێراق رایانگەیاند: "ئێمە وەك پەرلەمانتارانی مانگرتوو لەسەرجەم فراكسیۆنەكان، ھەوڵەكانی سەرۆك كۆماری عێراق بەرز دەنرخێنین لە پێناو چارەسەری قەیرانی سیاسی ئێستای عێراق، شاندێكی سەرۆكایەتی كۆمار سەردانی كردووین و كۆمەڵێك خاڵی بۆ ھێناوین، بەڵام سەرجەم ئەو خاڵانەی بۆمان نێردراون لەگەڵ پەیڕەوی نوێی پەرلەماندا ناگونجێن".
ئەو بەیاننامەیە كە لە لایەن ھەیسەم جبووری، گوتەبێژی پەرلەمانتارانی مانگرتوو خوێندرایەوە و ئاماژەی بۆ ئەوەكرد: "ناتوانرێت جارێكی دیكە دەنگ لەسەر لە كارلابردنی سەرۆكی ئەنجوومەنی نوێنەرانی عێراق بدرێت، بۆیە رەتكردنەوەی ئەو خاڵانەمان بە شاندەكەی سەرۆك كۆمار راگەیاند، داوامان لە سەرۆك كۆمار ئەوەیە خاڵ و تێبینییەكانی ئێمەش لەبەر چاو بگرێت".
لە بەشێكی دیكەی بەیاننامەی پەرلەمانتارە مانگرتووەكانی عێراقدا ھاتوو: "داوا لە خۆپێشاندەران دەكەین دان بەخۆیاندا بگرن و ھەڵنەكوتە سەر دامودەزگاكانی حكوومەت، داواكاری ئێمەش ھەمان داواكاری ئەوانن، لەم دۆخەی ئێستا عێراق پێیدا تێپەڕ دەبێت دەبێ یەك ھەڵوێست بین بۆ ئەوەی عێراق بگەیەنین بە كەناری ئارامی".