جەبار یاوەر: خورماتوو پێویستی بە حەشدی شەعبی نییە

ھێڵێكی بەرگری دیاریكراو ھەیە
https://k24mediaservice.streaming.mediaservices.windows.net/180cb309-3af8-48f6-b8bb-3c6fe6121b87/yawar%20uhashd.ism/manifest

K24 - ھەولێر:

ئەمینداری گشتیی وەزارەتی پێشمەرگە رایگەیاند، خورماتوو پێویستی بە حەشدی شەعبی نییە، داعش لە دەرەوەی خورماتووە، بۆیە دەبێ ھێزەكانیان بۆ رووبەڕووبونەوەی داعش ببەنە دەرەوەی خورماتوو.

لە میانی بەشداریكردنی  لە بەرنامەی باسی رۆژی (كوردستان24) جەبار یاوەر، ئەمینداری گشتیی وەزارەتی پێشمەرگە رایگەیاند: "سەنتەری قەزای خورماتوو پێویستی بە حەشدی شەعبی نییە، سەربان و خانووی ماڵەكان بكرێت بە بنكە و بارەگای سەربازی، ئێمە دووژمنەكەمان داعشە، داعش لە دەرەوەی خورماتووە".

گوتیشی: "بۆ رووبەڕووبونەوەی داعش ھێڵێكی بەرگری دیاریكراو ھەیە، لەو ھێڵی بەرگرییە ھێزەكانی پێشمەرگە لەگەڵ ھێزەكانی دیكەی پاراستنی ھەرێمی كوردستان بڵاوەیان پێكراوە، ھەر ھێزێكی چەكدار لە ناوچەكە بێت بۆ شەڕی دژی داعشە، دەبێ بێنە دەرەوەی شار بۆ ئەوەی بەیەكەوە شەڕی چەكدارانی داعش بكەین و بتوانین داعش لە ناوچەكانی دەرەوەی خورماتوو دوور بخەینەوە و ناوچەكانیان لێ پاك بكەینەوە".

جەبار یاوەر، ئاماژەی بۆ ئەوەشكرد: "بوونی ئەو ھەموو بنكە و بارەگایە لە ناو شار دیاردەیەكە ناگونجێ لەگەڵ ھەلومەرجی سەنتەری قەزایەكی گەورە، ئەمە بووەتە كێشەیەك ئەوە چەندەمین جارە شەڕ و ئاژاوە لە ناو خورماتوو دروست دەبێت".

ئەمە لە كاتێكدایە لە كۆتایی ساڵی 2014، لە لایەن بەرپرسانی شیعە لە عێراق بە پاساوی شەڕی داعش حەشدی شەعبی لە خورماتوو جێگیركراوە، لەو كاتەوە چەندینجار شەڕ و ئاڵۆزیی لە نێوان ھێزی پێشمەرگە و حەشدی شەعبی لەو شارۆچكەیە روویداوە، لە 23ی ئەم مانگەش جارێكی دیكە شەڕ لە خورماتوو دەستیپێكردەوە.