هەژاری لە شارەکانی ئێران پەرەدەستێنێت

له‌لادێكان كه‌مبووه‌

K24 - هه‌ولێر:

جێگری کۆمەڵایەتی و خۆشگوزەرانیی وەزارەتی کار و کاروباری کۆمەڵایەتیی کۆماری ئیسلامی رایگەیاند, هەژاری لە گوندەکانی ئێران کەم بووەتەوە و لە شارەکان پەرەی سەندووە.

ئەحمەد میدەری، بە ئاژانسی هەواڵی مێهری راگەیاند, یازدە ساڵە ئەم وه‌زاره‌ته‌ راپۆرتێکی لەبارەی گۆرانکارییەکانی ئاستی هەژاری لە ئێران ئامادە نەکردووە.

میدەری گوتی: "ئەمساڵ راپۆرتی تەواومان لەم بارەیەوە ئامادە کردووە و درزی هەژارایی شار و گوندەکان گۆڕانکاریی بەسەردا هاتووە و رەوتەکەی پێچەوانە بووەتەوە".

ئەم بەرپرسەی وەزارەتی کاری ئێران هه‌روه‌ها ده‌ڵێت: "بەهۆی کۆچی بە لێشاوی خەڵك لە گوندەکانەوە بۆ پەراوێزی شارەکان و نەدۆزینەوەی کار بۆ ئەو خەڵکە، رێژەی هەژاری لە شارەکان بەرێژەیەکی بەرچاو لە زیادبوون دایە, نەبوونی پلانێکی تۆکمەش بۆ ئەم بابەتە هۆکاری سەرەکیی ئەم گۆرانکارییە".