پارتێكی توركمانی ئاماژە بە پێشێلكارییەكان دەكات لە كەركووك

عرفان كەركووكی، سەرۆكی پارتی گەلی توركمان، ئەمڕۆ ھەینی، جەختیكردەوە لە كۆمەڵێك پێوەر بۆ سەركەوتنی ھەڵبژاردنی پێشوەختە لە پارێزگای كەركووك
عرفان كەركووكی، سەرۆكی پارتی گەلی توركمان
عرفان كەركووكی، سەرۆكی پارتی گەلی توركمان

K24 – ھەولێر:

عیرفان كەركووكی، سەرۆكی پارتی گەلی توركمان، ئەمڕۆ ھەینی، جەختیكردەوە لە كۆمەڵێك پێوەر بۆ سەركەوتنی ھەڵبژاردنی پێشوەختە لە پارێزگای كەركووك.

كەركووك تاكە پارێزگایە لە عێراق لە پرسی ھەڵبژاردنەكاندا مشتومڕ و ناكۆكی لێدەكەوێتەوە، بەھۆی گرنگی و ململانێكانی لەسەری.

كورد، راكان جبووری پارێزگاری شاره‌كه‌ تۆمەتبار دەكات بە رێكخستنی ھەڵمەتەكانی بەعەرەبكردن لەو پارێزگایە، كە ھاوشێوەی ھەڵمەتەكانی رژێمی پێشووی بەعس و سەدام حوسێنە. مەبەست لە بە عەرەبكردن پەراوێزخستن و  بە زۆر دەركردنی كوردە و گۆڕینی دۆخی كۆمەڵایەتی و رۆشنبیری و سیاسیی كورده‌ بۆ بەرژەوەندی عەرەب.

عیرفان كەركووكی سەرۆكی پارتی گەلی توركمان بە شەفەق نیۆزی گوت: "گەڕانەوەی متمانە بۆ كەركووكییەكان بنەمایەكی سەرەكیی سەركەوتنی ھەڵبژاردنەكانی پێشوەختەیە".

كەركووكی گوتیشی: "پارێزگای كەركووك پێویستی بە ئاساییكردنەوەی رەوشەكەیە لە نێوان ھەرێمی كوردستان و بەغدا، وەك ئەوەی لە شنگار روویدا، بەپێچەوانەی ئەمەش یەك لایەن ھەموو شتەكان بۆ بەرژەوەندی خۆی دەقۆزتەوە، بەتایبەتی دوای ئەنجامدانی ئەو ھەڵمەتانەی بەعەربكردنی كە لە دوای رووداوەكانی ریفراندۆم و 16ی ئۆكتۆبەرەوە ھاتووەتە ئاراوە.

عیرفان كەركووكی روونیكردەوە "بۆ خۆئامادەكرن بۆ ھەڵبژاردنی ئەو كاتە، پێویستە، پارتی دیموكراتی كوردستان و پارتی گەلی توركمان بارەگاكانیان لە دەست ھێزەكانی عێراقی و حەشدی شەعبی بگەڕێننەوە، تەنانەت خانووەكەی خۆمیش لە لایەن چەكدارانی عەسایب ئەھلولھەق و بزووتنەوەی نوجەبا داگیركراوە. دوامان لە كازمی كردووە، دەستوەردان بكات لەو پێشێلكارییانەی دەكرێت بەرامبەر بە مافەكانی ھاووڵاتی كەركووكی".

ئەنجوومەنی وەزیرانی عێراق، رێكەوتی 10/10/2021 دەستنیشانكردووە بۆ ئەنجامدانی ھەڵبژاردنەكانی پێشوەختە.

پرسی ھەڵبژاردن لە كەركووك بەردەوام دۆسیەیه‌كی پڕ لە ناكۆكی سیاسی بووە، بەھۆی ئەو ململانێیەی لایەنە دەركییەكان پێش ناوخۆییەكان دەیكەن بەھۆی دەوڵەمەندی شارەكە بە نەوت و دەیانەوێت نەكەوێتە ژێر دەسەڵاتی كورد، ھەرچەندە زیاتر لە نیوەی دانیشتوانی پارێزگاكە كوردن.