شاندی حکومەتی ھەرێم داتا و زانیارییەكان بۆ لیژنەی دارایی پەرلەمانی عێراق دەخاتەڕوو
K24 – ھەولێر
شاندی حكومەتی ھەرێمی كوردستان لە بەغدا، داتا و زانیارییەكان بۆ لیژنەی دارایی پەرلەمانی عێراق دەخاتەڕوو.
سەمیر هەورامی، گوتەبێژی جێگری سەرۆکی حکومەتی هەرێمی کوردستان بە کوردستان24ی راگەیاند: "شاندی حکومەت بە سەرۆکایەتی قوباد تاڵەبانی، شەوی رابردوو لەگەڵ لیژنەی دارایی پەرلەمانی عێراق كۆبووەوە.
گوتیشی: "لە کۆبوونەوەکەدا بە وردی و بە ژمارە گفتوگۆ لەبارەی داهات و خەرجییەکان کرا و هەموو ئەو داتا و زانیاریانەی هەرێمی کوردستانیش کە پێویست بوون بۆ لیژنەی دارایی پەرلەمانی عێراق، خرانەڕوو".
سەمیر هەورامی ئاشکراشی کرد: "کۆبوونەوەکانی شاندی حکومەت لە بەغدا تا چەسپاندنی رێککەوتنی مانگی 12ی ساڵی رابردوو لە بودجەی گشتیدا بەردەوام دەبن".
رۆژی یەكشەممە 24/1/2021 شاندی حكومەتی ھەرێمی كوردستان بۆ گفتوگۆ لەگەڵ حكومەتی عێراق سەردانی بەغدای كردەوە و بۆ ئەوەی لەبارەی پشكی ھەرێم لە بودجەی گشتی 2021ی عێراق بگەنە رێككەوتن.