مه‌سرور بارزانی: ئه‌مڕۆ یادی یه‌كبوونی گه‌لی كورده
K24- هه‌ولێر:
مه‌سرور بارزانی، سه‌رۆكی حكومه‌تی هه‌رێمی كوردستان په‌یامێكی به‌بۆنه‌ی شه‌شه‌مین ساڵیادی رزگاركردنی كۆبانێ له‌ده‌ست چه‌كدارانی داعش راگه‌یاند.
له تویتێكدا له هه‌ژماری تایبه‌تی خۆی له تۆڕی تویته‌ر، مه‌سرور بارزانی نووسیویه‌تی: "ئەمڕۆ تەنیا یادی ئازادکردنی کۆبانێ نییە لە داگیرکاریی و زۆرداریی داعش، بەڵکو یادی یه‌كبوونی گەلی کوردیشە لە دژی دوژمنێکی هاوبەش".
سه‌رۆكی حكومه‌تی هه‌رێمی كوردستان دوواپاتیكرده‌وه، كورد هه‌میشه به یه‌كگرتوویی سه‌ركه‌وتووتره و نووسیویه‌تی: "ئەمەش بیرخەرەوەیەکی بەهێزە کە هەمیشە بە یەکڕیزیی سەرکەوتووترین".
به‌ر له 6 ساڵ، له 26ی كانوونی دووه‌می ساڵی 2015، هێزه‌كانی پێشمه‌رگه‌ی كوردستان له‌سه‌ر فه‌رمانی سه‌رۆك مه‌سعود بارزانی، ره‌وانه‌ی رۆژئاوای كوردستان كران، بۆ ئه‌وه‌ی به‌شداری له ئۆپه‌راسیۆنی رزگاركردنی كۆبانێدا بكه‌ن، كه به هاوكاری شه‌ڕڤانانی كورد و هێزه‌كانی هاوپه‌یمانی نێوده‌وڵه‌تی دژ به داعش توانرا داستانێكی چاونه‌ترسی تۆمار بكه‌ن و كۆبانی له‌ده‌ست چه‌كدارانی داعش رزگار بكه‌ن.
H.B
