له هه‌ولێر دزران و له سلێمانی ده‌ستیان به‌سه‌رداگیرا
K24- سلێمانی:
له راگه‌یه‌ندراوێكدا به‌ڕێوه‌به‌رایه‌تی پۆلیسی پارێزگای سلێمانی ده‌ستبه‌سه‌رداگرتنی دوو ئۆتۆمبیلی راگه‌یاند، كه له هه‌ولێر دزرابوون.
له راگه‌یه‌ندراوه‌كه‌ی به‌ڕێوه‌به‌رایه‌تی پۆلیسی پارێزگای سلێمانیدا هاتووه: له‌سه‌ر راسپارده‌ی بەڕێوەبەری پۆلیسی پارێزگای سلێمانی و لەژێر رۆشنایی زانیارییەكانی بەڕێوەبەرایەتی پۆلیسی هەولێر، دوو ئۆتۆمبێل لە ناو پارێزگای سلێمانی دۆزرانەوە و دوای تەواوكردنی رێكارە یاساییەكان رەوانەی پۆلیسی هەولێر دەكرێنەوە .
ئاماژه به‌وه‌ش دراوه، دوای ئەوەی بەڕێوەبەرایەتی پۆلیسی پارێزگای هەولێر - بەشی پۆلیسی نەهێشتنی تاوان، بەڕێوەبەرایەتی پۆلیسی پارێزگای سلێمانی ئاگاداركردەوە لە هاتنی دوو ئۆتۆمبێل بۆ ناو پارێزگای سلێمانی كە دزراون، بەڕێوەبەری پۆلیسی پارێزگای سلێمانی سەرجەم بەش و بنكەكانی سنووری پۆلیسی سلێمانیی ئاگاداركردەوە، كە لێكۆڵینەوە و بەدواداچوون بكەن بۆ دۆزینەوەی ئەو ئۆتۆمبێلانە .
هه‌روه‌ها رایگه‌یاند، لەژێر رۆشنایی زانیارییەكانی پۆلیسی نەهێشتنی تاوانی هەولێر و لێكۆڵینەوەكانی پۆلیسی سلێمانی توانرا هەردوو ئۆتۆمبێلەكە بدۆزرێنەوە، كە یەكێكیان لە قەزای چەمچەماڵ و لەلایەن بەشی پۆلیسی چەمچەماڵ، ئەوی تریان لە قەزای شارەزور و لەلایەن بنكەی پۆلیسی وارماواوە دۆزراونەتەوە و دوای تەواو كردنی رێكارە یاساییەكان رەوانەی بەڕێوەبەرایەتی پۆلیسی پارێزگای هەولێر دەكرێنەوە.
H.B