عێراق و هاوپه‌یمانی نێوده‌وڵه‌تی فشاره‌كانیان له‌سه‌ر داعش زیاتر كردووه‌

هێزه‌ ئه‌منییه‌كانی عێراق و هاوپه‌یمانی نێوده‌وڵه‌تی دژی داعش، هه‌وڵه‌كانیان بۆ دژایه‌تیكردنی داعش و كۆتایهێنان به‌ جموجووڵه‌كانی له‌ عێراق چڕ كردووه‌ته‌وه‌. ئه‌مه‌ش دوای ئه‌وه‌ دێت ژماره‌یه‌ك به‌رپرسی داعش له‌ چه‌ند رۆژی رابردوودا كوژران.
ژماره‌یه‌ك سه‌ربازی هاوپه‌یمانی دژ به‌ داعش له‌ عێراقدا
ژماره‌یه‌ك سه‌ربازی هاوپه‌یمانی دژ به‌ داعش له‌ عێراقدا

K24 – هه‌ولێر:

هێزه‌ ئه‌منییه‌كانی عێراق و هاوپه‌یمانی نێوده‌وڵه‌تی دژی داعش، هه‌وڵه‌كانیان بۆ دژایه‌تیكردنی داعش و كۆتایهێنان به‌ جموجووڵه‌كانی له‌ عێراق چڕ كردووه‌ته‌وه‌. ئه‌مه‌ش دوای ئه‌وه‌ دێت ژماره‌یه‌ك به‌رپرسی داعش له‌ چه‌ند رۆژی رابردوودا كوژران.

رۆژی چوارشه‌ممه‌ (3ی شوبات/ فێبرایه‌ری 2021)، هاوپه‌یمانی نێوده‌وڵه‌تی دژی داعش، پشتڕاستیكرده‌وه‌، "ئه‌بو حه‌سه‌ن ئه‌لغه‌رباوی" و سێ چه‌كداری دیكه‌ی داعشیان له‌ ئاكامی هێرشێكدا له‌ سێشه‌ممه‌ی ئه‌م هه‌فته‌یه‌ له‌ خۆرئاوای به‌غدا كوشتووه‌.

سه‌رۆك وه‌زیرانی عێراقی ئیتیحادی، "مسته‌فا كازمی" له‌و باره‌یه‌وه‌ گوتی: "غه‌رباوی، فه‌رمانده‌ی باشووری عێراقی رێكخراوی داعش بوو. هه‌روه‌ها غانم سه‌باح، به‌رپرسی گواستنه‌وه‌ی چه‌كداره‌ خۆكوژه‌كان بوو، هه‌ردووكیان كوژراوون".

پێشتر، "كازمی" رایگه‌یاندبوو، والی عێراقی رێكخراوی داعش، "ئه‌بو یاسر ئه‌لعیساوی" و ژماره‌یه‌ك به‌رپرسی دیكه‌ی داعشیان كوشتووه‌.

ئه‌م ته‌نگپێهه‌ڵچنینه‌ی داعش، دوای ئه‌وه‌ دێت، مانگی رابردوو، داعش كرده‌یه‌كی خۆكوژی له‌ بازارێكی میللی به‌غدا كرد و له‌ ئاكامدا (32) كه‌س كوژران و زیاتر له‌ (100) كه‌س بریندار بوون.

به‌رپرسێكی هاوپه‌یمانی نێوده‌وڵه‌تی دژی داعش، به‌ سایتی "ده‌نگی ئه‌مه‌ریكا"ی راگه‌یاندووه‌، "كوژرانی عیساوی گورزێكی كوشنده‌ بوو، به‌ر رێكخراوی داعش كه‌وت، به‌ڵام ده‌بێت هۆشیار بین و هه‌ڕه‌شه‌ی داعش له‌ناو نه‌چووه‌، چونكه‌ ئه‌و رێكخراوه‌ به‌رده‌وام بیر له‌ زیندووكردنه‌وه‌ی خه‌ونی خیلافه‌ته‌كه‌ی ده‌كاته‌وه‌".

كۆڵۆنێڵ، "واین مارۆتۆ"، گوته‌بێژی هاوپه‌یمانییه‌كه‌ له‌ وه‌ڵامی پرسیارێكی رۆژنامه‌وانیدا، گوتی: "داعش هه‌رچه‌نده‌، له‌ رووی هه‌رێمایه‌تییه‌وه‌ تێكشكاوه‌، به‌ڵام هێشتا هه‌ڕه‌شه‌یه‌".

ئه‌و گوتیشی: "پێویسته‌ به‌رده‌وام فشار له‌سه‌ر داعش هه‌بێت، بۆ ئه‌وه‌ی هه‌ڵنه‌ستێته‌وه‌ سه‌ر پێ".

به‌رپرسه‌ ئه‌مه‌ریكاییه‌كان نیگه‌رانن له‌ هه‌ڵكشانی توانای رێكخراوی داعش و پێیان وایه‌، ئه‌و كرده‌ تیرۆریستییه‌ی داعش مانگی رابردوو له‌ به‌غدا كردی، له‌ (2018)ه‌وه‌ وێنه‌ی نه‌بینراوه‌ و كرده‌وه‌كه‌ ئاماژه‌یه‌ به‌ توانای رێكخراوه‌كه‌.

له‌و چوارچێوه‌یه‌دا، به‌رپرسێكی سه‌ربازی ئه‌مه‌ریكا وتوویه‌تی: ژێرخانی رێكخستنی داعش و هاوڕێكییه‌كه‌ی یارمه‌تیده‌رییه‌تی بۆ ئه‌وه‌ی پارێزگاری له‌ هه‌ژموونی خۆی بكات و له‌ هه‌ندێك ناوچه‌ش هه‌ژموونی هه‌ڵكشێت، سه‌ره‌ڕای ئه‌و فشاره‌ زۆره‌ی خراوه‌ته‌ سه‌ری".

به‌رپرسانی سه‌ربازی ئه‌مه‌ریكا هۆشداری ده‌ده‌ن له‌وه‌ی ئه‌گه‌ری زۆر هه‌یه‌، له‌ به‌شێكی‌ خاكی عێراق و سووریا ره‌نگه‌ رێكخراوی ده‌وڵه‌تی ئیسلامی بتوانێت "ژینگه‌یه‌كی گونجاو درووست بكات بۆ ئه‌وه‌ی له‌ هه‌لومه‌رجی گونجاودا ده‌ست به‌ كاری زیاتر بكات".

مه‌ترسییه‌كان زیاتر روویان له‌ باكوور و ناوه‌ڕاستی عێراقه‌. به‌رپرسه‌ سه‌ربازییه‌كان ده‌ڵێن "داعش كۆمه‌ڵێك كرده‌ی كوشتن و هێرشی له‌ رێی بۆمبه‌ چێندراوه‌كانه‌وه‌ ئه‌نجامداوه‌".

به‌ گوێره‌ی مه‌زنده‌ی به‌رپرسانی به‌ره‌نگاربوونه‌وه‌ی تیرۆر له‌ نه‌ته‌وه‌یه‌كگرتووه‌كان، ژماره‌ی چه‌كدارانی داعش له‌م هه‌لومه‌رجه‌دا ده‌گاته‌ (10) هه‌زار چه‌كدار و هه‌ندێك به‌رپرسی ئه‌مه‌ریكاییش، پێیان وایه‌ ژماره‌ی چه‌كدارانی داعش له‌ عێراق و سووریا له‌ نێوان (14 - 16) هه‌زار چه‌كداره‌.

سه‌رچاوه‌: الحرة

وه‌رگێڕان: ئ.ر