وەزیری بەرگری تورکیا نهێنییەک لەبارەی رزگارکردنی بەندکراوەکانیان ئاشکرا دەکات

K24- هەولێر:

خولوسی ئاکار، وەزیری بەرگری تورکیا رایگەیاند، تەرمی 13 بەندکراوی تورکیان لە یەکێک لە ئەشکەوتەکانی ''باکووری عێراق'' دۆزیوەتەوە.

وەزیری بەرگری کە دوێنێ شەممە سەردانی هێزەکانی لە ناوچە سنوورییەکانی نێوان هەرێمی کوردستان و تورکیا کرد، بە مەبەستی ئاگاداربوون لە جەنگی سوپای تورکیا و پەکەکە، رایگەیاند، پێشتر رفاندنی ئەو 13 هاووڵاتییەمان بەهۆی هۆکاری ئەمنی رانەگەیاندبوو، بەڵام تەرمی هەموویان لە ئەشکەوتێک دۆزرانەوە.

ئەوەشی ئاشکرا کرد، ''بارمتەکان بێ چەک و بێ تاوان بوون، 12 کەسیان گولـلە بە سەریان کەوتووە و یەکێکی دیکەش تەقە لە شان و ملی کراوە''.

بە گووتەی وەزیری بەرگری تورکیا، دوو چەکداری پەکەکەیان دەستگیر کردووە و زانیارییەکانیان لەوان وەرگرتووە.

تاوەکو ئێستا، پەکەکە وەڵامی ئەم لێدوانانەی وەزیری بەگری تورکیای نەداوەوەتەوە و پشتڕاستی نەکردوونەتەوە.

چەند رۆژێکە تورکیا ئۆپراسیۆنی "چنگی هه‌ڵۆ -2" بۆ سه‌ر هێزه‌كانی پارتی كرێكارانی كوردستان له‌ سنووری ناوچه‌ی گاره‌ ده‌ستیپێكردووە و شەڕ و پێکدادان بەردەوامە‌.

Reuters