جوتیاران کێشەی هەناردەکردنی بەرهەمەکانیان بۆ ناوەڕاست و خوارووی عێراق ههیه
K24 - ههولێر:
جوتیارانی ھەرێمی کوردستان گرفتیان ھەیە، کە رێگە نادرێت بەرھەمەکانیان ھەناردەی ناوەڕاست و خوارووی عێراق بکەن، بەڵام بەرھەمی ئەوان ھاوردە دەکرێت و لەم بارودۆخەش زۆر زەرەرمەند بوون، چەند جوتیارێک بۆ کوردستان24 ئاماژهیان بهوه كرد، لەبەر بەرھەمی قاچاغی تورکی و ئێرانی و سووری بۆ عێراق، ناھێڵن بەرھەمەکانیان ساغ ببێتەوە.
لە عەلوەی ھەولێر، بەشی زۆری ئەو کەلوپەلانەی دەبینرێن، عێراقی و سووری و ئێرانی و تورکییە، بەشێکی بە قاچاغ و بەشێکیش رێگە پێدراون.
جوتیاران بەدەست بەرھەمی بێگانەوە ماندوو و شەکەت بوون، بەرھەمی خۆشیان ساغ نابێتەوە.
مام حوسێن عهلی، (40) ساڵە جوتیارە، تاکە گلەیی ئەوەیە بھێڵن بەرھەمەکانی ساغبکاتەوە، ئەو روونیكردهوه، لهبهر کەلەم و پەتاتە و پیاز و خاسی ئێرانی و سووری و تورکی، ھی ناوخۆ ساغ نابێتەوە.
جوتیارانی ھەرێم لە دوو لاوە زەرەرمەندن، لە لایەك بەرھەمی قاچاغ تەنگی پێ ھەڵچنیوون، لە لایەکی دیکەش حکومەتی عێراق ناھێڵێت بەرھەمەکانیان بنێرنە ناوەڕاست و خوارووی عێراق.
وەزارەتی کشتوکاڵ، بەشێک لە بەرھەمە وەرزییەکانی قەدەغە کردووە، بەڵام ئێستا عەلوەکان پڕبوون لە بەرھەمی قاچاغ و پشکی شێری ھەموو بەرھەمە قاچاغەکانیش، بەر بەرھەمی ئێرانی دەکەوێت، ئەمە جگە لە بەرھەمی ناوەڕاست و خوارووی عێراق.
د.ی