سیاسەتی ئەمەریکا بەرامبەر تورکیا گۆڕانکاری بەسەردا نەهاتووە

هەڵوێستی نوێی ئەمەریکا بەرامبەر تورکیا
author_image Kurdistan24
سیستمی دژە مووشەکی ئێس-400 رووسی
سیستمی دژە مووشەکی ئێس-400 رووسی

K24- هەولێر:

ویلایەتە یەکگرتووەکانی ئەمریکا جەختدەکاتەوە؛ سیاسەتەکانی بەرامبەر تورکیا نەگۆڕاوە.

جۆن کێربی، گوتەبێژی وەزارەتی بەرگری ئەمەریکا روونیکردووەتەوە؛ سیاسەتی ئیدارەی بایدن لە بەرامبەر تورکیا نەگۆڕاوە.

کێربی دەڵێت: "جارێکی دیکە داوا لە تورکیا دەکەین لە پڕۆسەی کڕینی دژە مووشەکی ئێس 400 بوەستێت، چونکە ئەمەریکا پێی وایە سیستەمەکە دژە لەگەڵ فڕۆکەی جەنگی ئێف 35 و بەمشێوەیەش ئەندامێتی تورکیا لە پڕۆگرامی دروستکردنی فڕۆکە جەنگییەکە بە هەڵپەسێردراوی دەمێنێتەوە".

گوتەبێژی پێنتاگۆن لەبارەی سیستمی دژە مووشەکی پاتریۆت رایگەیاند: "لە دەیەی رابردوودا چەندین هەلی کڕینی سیستمی پاتریۆت بۆ تورکیا رەخساوە، کەچی ئەنقەرە ئێس 400ـی هەڵبژاردووە کە ئەمە قازانج بە رووسیا دەگەیەنێت و هەژموونی زیاد دەکات".

تورکیا یەکەم کاروانی سیستمی دژە مووشەکی ئێس- 400ـی لە لایەن رووسیاوە پێدراوە، کارەکەشی بە یاسایی دەزانێت و دژایەتیی ئەمەریکاش رەتدەکاتەوە.