لە خۆپیشاندانەکانی ئه‌مڕۆی ناسرییەدا3 کەسی دیکە کوژران

به‌ ده‌یان خۆپیشانده‌ری دیكه‌ برینداربوون و ته‌ندروستی زیقاریش داوای خوێنبه‌خشین له‌ هاووڵاتیان ده‌كات
توندوتیژی و خۆپیشاندانه‌كانی شاری ناسریه‌ی سه‌نته‌ری پارێزگای زیقار
توندوتیژی و خۆپیشاندانه‌كانی شاری ناسریه‌ی سه‌نته‌ری پارێزگای زیقار

K24- هه‌ولێر:

ئاژانسی هەواڵی فرانس پرێس رایگەیاند: لە خۆپیشاندانەکانی ئەمڕۆی شاری ناسرییەی سه‌نته‌ری پارێزگای زیقار لە باشووری عێراق، 3 خۆپیشاندەری دیکە کوژراون و ژمارەی كوژراوانی خۆپیشانده‌رانی ئه‌م چه‌ند رۆژه‌ گەیشته‌ 5 کەس.

كۆمسیۆنی مافی مرۆڤیش له‌ عێراق له‌ به‌یاننامه‌یه‌كدا هۆشداری له‌باره‌ی له‌ده‌ستده‌رچوونی دۆخی زیقار دا و وێڕای نیشاندانی نیگه‌رانی خۆی له‌باره‌ی گرژی و خۆپیشاندانه‌كانی ئه‌و پارێزگایه‌، هه‌روه‌ها دووپاتیكرده‌وه‌، هه‌ر له‌ خۆپیشاندانه‌كانی ئه‌مڕۆی شاری ناسرییه‌دا جگه‌ له‌ كوژرانی ئه‌و 3 كه‌سه‌، 147 كه‌سی دیكه‌ش بریندار بوون، كه‌ دۆخی ته‌ندروستی به‌شێكیان ناجێگیره‌.

به‌گوێره‌ی میدیا عێراقییه‌كانیش، گرژییه‌كانی ئه‌مڕۆ دوای ئه‌وه‌ هاتوون، كه‌ خۆپیشانده‌ران هه‌ڵیانكوتایه‌ سه‌ر بینایه‌ی پارێزگا و داوای ده‌ستله‌كاركێشانه‌وه‌ی پارێزگار و حكومه‌تی خۆجێیی پارێزگاكه‌یان ده‌كرد، دواتر ئاگریان له‌ بینایه‌ی پارێزگا به‌رداوه‌ و گرژی و ئاڵۆزی له‌ نێوان خۆپیشانده‌ران و هێزه‌ ئه‌منییه‌كان روویداوه‌.

به‌هۆی زۆری ژماره‌ی بریندارانیش له‌ بانگه‌وازێكدا، به‌ڕێوه‌به‌رایه‌تی ته‌ندروستی پارێزگای زیقار داوای به‌خشینی خوێن له‌ هاووڵاتیان ده‌كات.

ماوه‌ی هه‌فته‌یه‌كه‌ خۆپیشاندان لە ناسریە دەستپێکردووەتەوە و ئاڵۆزی و رووبەڕووبوونەوە لەنێوان هێزە ئەمنییەکان و خۆپیشاندەران به‌ بەردەوامی روودەده‌ن و پێشتر دوو خۆپیشاندەر و ئەمڕۆش 3 خۆپیشاندەری دیکە کوژراون.

H.B