رووحانی: دانووستان له‌ باره‌ی رێككه‌وتنی ناووكی ناكه‌ینه‌وه‌

سه‌رۆكی كۆماری ئیسلامی ئێران، حه‌سه‌ن رووحانی، رایگه‌یاند، وڵاته‌كه‌ی هه‌رگیز جارێكی دیكه‌ ده‌ست به‌ دانووستان له‌ باره‌ی رێككه‌وتنی ناووكی ناكاته‌وه‌.
حه‌سه‌ن رووحانی
حه‌سه‌ن رووحانی

K24 – هه‌ولێر:

سه‌رۆكی كۆماری ئیسلامی ئێران، حه‌سه‌ن رووحانی، رایگه‌یاند، وڵاته‌كه‌ی هه‌رگیز جارێكی دیكه‌ ده‌ست به‌ دانووستان له‌ باره‌ی رێككه‌وتنی ناووكی ناكاته‌وه‌.

سه‌رۆكی ئێران له‌ په‌یوه‌ندییه‌كی ته‌له‌فۆنیدا له‌گه‌ڵ هاوتا فه‌ره‌نساییه‌كه‌ی، ئیمانوێڵ ماكرۆن، گوتی: ئێمه‌ ئاماده‌ نین بۆ ژیاندنه‌وه‌ی رێككه‌وتنی ناووكی و لاچوونی سزاكانی سه‌ر ئێران ده‌ست به‌ دانووستان بكه‌ینه‌وه‌.

رێككه‌وتنی ناووكی ئێران و وڵاتانی ئه‌نجوومه‌نی ئاسایشی نێوده‌وڵه‌تی و ئه‌ڵمانیا له‌ ناوه‌ڕاستی ته‌مموزی 2015 له‌ برۆكسل واژوو كرا.

له‌ 2018دا ئیداره‌ی سه‌رۆكی پێشووی ئه‌مه‌ریكا، دۆناڵد تره‌مپ له‌ رێككه‌وتنه‌كه‌ پاشه‌كشه‌ی كرد و سزای به‌سه‌ر ئێراندا سه‌پانده‌وه‌.

رووحانی گوتیشی: رێككه‌وتنی ناووكی، رێككه‌وتنێكی نێوده‌وڵه‌تی فره‌لایه‌نه‌ و به‌ گوێره‌ی بڕیاری 2231ی ئه‌نجوومه‌نی ئاسایشی نێوده‌وڵه‌تی په‌سند كراوه‌.

روونیشیكرده‌وه‌، له‌ به‌رامبه‌ر كشانه‌وه‌ی ئه‌مه‌ریكا له‌ رێكه‌وتنه‌كه‌ و ده‌سته‌وه‌ستانی ئه‌وروپاییه‌كان له‌ جێبه‌جێكردنی به‌ڵێنه‌كانیان، ئێمه‌ش ناچار بووین هه‌ندێك له‌ ئاستی پابه‌ندبوونمان كه‌مبكه‌ینه‌وه‌.

رووحانی ئاماده‌یی وڵاته‌كه‌شی ده‌ربڕی بۆ جێبه‌جێكردنی پابه‌ندییه‌كانی، ئه‌گه‌ر به‌رامبه‌ره‌كانی پابه‌ندی به‌ڵێنه‌كانیان و ده‌قی رێككه‌وتنه‌كه‌ ببن.