دووەمین پێشانگای بازرگانی ئۆنلاین لەنێوان هەولێر و ژینهوای چین بەڕێوەدەچێت
ئەمڕۆ پێشانگایەکی بازرگانی ئۆنڵاین لە نێوان پارێزگای هەولێر لەگەڵ پارێزگای ژینهوا لە هەرێمی ژێژیانگی چین بەڕێوەدەچێت.
لقی هەولێری یەکێتی هاوردە و ناردنکارانی هەرێمی کوردستان، بە هاوبەشی لەگەڵ رێکخراوی کەی ئەی سی ئێکسپۆی چینی و هەماهەنگی کونسوڵخانەی چین لە هەولێر، دووەم پێشانگای بازرگانی ئۆنلاین لەنێوان پارێزگای هەولێر و پارێزگای ژینهوای چینی ئەنجامدەدات.
ئەژین قادر، نێردراوی كوردستان24 لە پێشانگاكە رایگەیاند: "نزیكەی 60 كۆمپانیای ھەرێمی كوردستان و 84 كۆمپانیای چینی بەشداری لە پێشانگاكە دەكەن، ئامانج لە پێشانگاكە پتەوكردنی بازرگانی نێوان ھەرێمی كوردستان و وڵاتی چینە، كە گرنگی خۆی دەبێت بۆ ئابووری ھەرێمی كوردستان".
گەیلان حاجی سەعید، سەرۆكی ھاوردە و ھەناردەكارانی ھەرێمی كوردستان بە كوردستان24ی گوت: "تەوەری سەرەكی پێشانگاكە قسەكردنە بۆ نەھێشتنی ئەو بەربەستانەی بەھۆی كۆرۆناوە لەنێوان ھەرێمی كوردستان و وڵاتان دروستبووە، ھەروەھا بتوانین پەرە بە پەیوەندییەكانمان بدەین بەتایبەتی لەگەڵ وڵاتی چین، كە لە زۆربەی كاتدا ھاوكارمان بووە لە ئاڵوگۆڕی بازرگانی".
گوتیشی: "بەرپرس و بازرگانانی چین بەردەوام جەخت لەوە دەكەنەوە دەیانەوێت لە رێگەی ھەرێمی كوردستانەوە بازرگانیی و وەبەرھێنان لەگەڵ عێراق بكەن، واتا ئەوان ھەرێمی كوردستان بە خاڵێكی گرنگ دەزانن، ئێمەش ھانمان داون بۆ وەبەرھێنان و بازرگانی زیاتر لە ھەرێمی كوردستان، ھاوكات جەختمان لەوە كردووەتەوە كە ئێمە دەبینە پردی پەیوەندی لەنێوان چین و عێراق".
سەرۆكی ھاوردە و ھەناردەكارانی ھەرێمی كوردستان، ئاماژەی بەوەشدا: "بەھۆی ڤایرۆسی كۆرۆنا دابڕانێك لەنێوان بازرگان و وڵاتان دروستبووە، بۆیە ئێمە دەمانەوێت لە رێگەی ئەم پێشناگایەوە، پەیوەندییەكان دروستبكەینەوە".