گۆڕانکارییەکانی لیژنەی دارایی لەسەر پڕۆژە یاسای بودجەی 2021 به‌م جۆره‌یه
K24 - هه‌ولێر:
لیژنه‌ی دارایی په‌رله‌مانی عێراق، به‌بێ ده‌ستكاریكردنی مادده‌ی 11، كه پشكی هه‌رێمی كوردستانه، گۆڕنكاری له ژماره‌یه‌ك خاڵ و بڕگه‌ی پرۆژه یاسای بودجه‌ی 2021دا كردووه.
تا ئیستاش هیچ كاتێك بۆ ده‌ستپێكردنی كۆبوونه‌وه‌ی په‌رله‌مان دانه‌نراوه تا پرۆژه یاساكه بخرێته ده‌نگدان و په‌سه‌ند بكرێت. به گوێره‌ی فه‌رمانگه‌ی میدیایی په‌رله‌مانی عێراق، ئێستا پرۆژه یاسای بودجه، له‌لای په‌رله‌مانتاران هه‌یه.
گرنگترین گۆڕانكارییه‌كان ئه‌مانه‌ن:
- کەمکردنەوەی بودجەی سێ سەرۆکایەتییەکە بە رێژەی 20%.
- کەمکردنەوەی کۆی کورتهێنان لە 47% بۆ 19%، واتە لە 76 ترلیۆن دینار بۆ 25 ترلیۆن دینار.
- کەمکردنەوەی قەرزکردن بۆ 51 ترلیۆن دینار.
- گەرەنتیکردنی شایستەی وانەبێژان، گرێبەست و کرێ.
- زیادکردنی گوژمەی گەشەپێدانی پارێزگاکان لە 2 بۆ 4 ترلیۆن دینار.
- زیادکردنی بڕی پێترۆ دۆلار بۆ پارێزگاکانی بەرهەمهێنەری نەوت لە 500 ملیار بۆ ترلیۆنێک دینار.
- هەڵوەشاندنەوەی بڕگەی بڕینی مووچەی فەرمانبەران و خانەنشینانی عێراق.
- زیادکردنی بودجەی چەکدارکردنی سوپای عێراق و دەزگای هەوالگری و پەرەپێدانی توانای جەنگی و زانیاریان بۆ رووبەڕووبوونەوەی هەڕەشەی تیرۆر
- زیادکردنی پارەی تەرخانکراو بۆ تۆڕی چاودێری کۆمەڵایەتی، بە زیادکردنی ترلیۆنێک و 500 ملیار دینار بەراورد بە 2020، هەروەها زیادکردنی خێزانەکان بۆ ئەوەی سوودمەند بن لە مینحەی چاودێری کۆمەڵایەتی
- دیاریکردنی بڕی دارایی تایبەت بۆ تەواوکردنی هێلەکانی بەرهەمهێنان لە کارگە گەورەکانی سەر بە وەزارەتی پیشەسازی
- دیاریکردنی گوژمەیەک بۆ قەرەبووکردنەوەی ئەو لایەنانەی کەرتی تایبەت کە لە بڕیاری دابەزاندنی بەهای دینار بەرامبەر دۆلار زیانیان بەرکەوتووە، ئەمەش لەسەر داواکاری وەزارەتی پلاندانان و چاودێری دیوانی چاودێری وەزارەتی دارایی، کە ئامانج لێی بەردەوامی پڕۆژەکانە.
- دیاریکردنی بڕێک پارە بۆ شایستەی جوتیاران و باخەوانان بە گشتی و رێگە پێدان بە هاوردەکردنی کەرەستەی بەکارهاتوو، هەروەها قەدەغەکردنی هاوردەی ئەو بەرهەمانەی لە عێراق بەرهەمدەهێندرێت، کە ئامانج لێی پشتیوانی کردنی جوتیارانە و بە مەبەستی پاڵپشتیکردنیش گوژمەی 200 ملیار دینار تەرخاندەکرێت بۆ دابینکردنی تۆو پەین و قڕکەری کشتوکاڵی.
- پاڵپشتی و بەشداریکردنی کەرتی تایبەت، کە زیاتر لە 5 ملیۆن هاووڵاتی عیراق کاری تێدا دەکەن، بۆ دامەزراندنی پڕۆژەی وەبەرهێنان و چالاککردنی بازاڕی ناوخۆ.
- تەرخانکردنی گوژمەیەک بۆ دامەزراندنی فڕۆکەخانەی نەینەوا و زیقار و بەندەری فاوی گەورە، هەروەها پڕۆژەی بدعە بۆ راکێشانی ئاوی پاک بۆ بەسڕە.
- زیادکردنی 339 ملیار دینار بۆ کڕینی دەرمان و بەرزکردنەوەی توانای کڕینی دەرمان و دابینکردنی بۆ هاووڵاتییان.
- تەرخانکردنی 199 ملیۆن دۆلار لەمساڵدا بۆ دامەزراندنی 1000 قوتابخانەی نوێ لە سەرجەم پارێزگاکان.
- دابینکردنی گوژمەی تایبەت بۆ دامەزراندنی وێستگەی کارەبا لە واست، سەماوە، ئەنبار و ناسرییە
