هۆڵەندا: دوای هێرشەکەی سەر هەولێر بە وردی چاودێری ناوچەکە دەکەین
K24- هەولێر:
مارک رووتە، سەرۆک وەزیرانی هۆڵەندا بە ڤیدیۆ کۆنفرانس لەگەڵ فەرماندە سەربازییەکانی هۆڵەندا لە هەولێر کۆبووەوە و باسی دۆخی شەڕی دژی داعش و پەتای کۆرۆنای لەگەڵ فەرماندە سەربازییەکانی هۆڵەندا لە فڕۆکەخانەی نێودەوڵەتی هەولێر کرد.
هەر لە کۆنفرانسەکە، ئانک بیلڤێلد، وەزیری بەرگری هۆڵەنەدا ئامادەبوو و بە فەرماندە سەربازییەکانی لە هەولێر گوت: ''بە رووبەڕووبوونەوەی داعش ئێوە کارێکی گەورە بۆ پاراستنی هۆڵەندا و ئەوروپا دەکەن''.
راشیگەیاند: ''هۆڵەندا لە دوای هێرشەکەی سەر هەولێر بە وردی چاودێری دۆخی ئەمنی عێراق دەکات''.
هەروەها، سەرۆک وەزیران، پشتیوانیی خۆی بۆ مانەوەی راوێژکارییەکانیان لە عێراق و ئەفغانستان دووپاتکردەوە.
نزیکەی 150 سەربازی هۆڵەندی لە فڕۆکەخانەی هەولێر شان بەشانی هێزە ئەمنییەکانی کوردستان و ئەمەریکا، بنکەی سەربازیی هاوپەیمانی نێودەوڵەتی بۆ شەڕی دژ بە داعش دەپارێزن.
هێرشەکەی سەر هەولێر، کاردانەوەی جیهانی لێکەوتەوە، لەسەر ئاستی ئەوروپا، ئەمەریکا و وڵاتانی عەرەبی کاردانەوەی بەدوای خۆیدا هێنا.