حوسییەكان ئۆپەراسیۆنێكی فراوانی مووشەكی و فڕۆكەی بێفڕۆكەكانیان لە دژی سعوودیە ئەنجام دا
K24 – ھەولێر:
گوتەبێژ بەناوی بزووتنەوەی "ئەنساروڵڵا" یەحیا سریع رایگەیاند، ئۆپەراسیۆنێكیان ئەنجامداوە، تێیدا 18 فڕۆكەی بێفڕۆكەوان و مووشەكی بالیستی بەكارھاتوون و كۆمپانیای "ئارامكۆ"یان لە رەئس تەنوورە، یەنبوع، رابغ و جیزان لەگەڵ بنكەیەكی سەربازی لە دەمام كردووەتەوە ئامانج.
سریع لە راگەیاندراوێكدا، كە لەسەر پێگەی تویتەر بڵاویكردووەتەوە گوتی: "پێگە سەربازییەكانی دیكە لە نەجران و عەسیر بە شەش فڕۆكە كرانە ئامانج، جەختیشیكردەوە لەوەی "ئۆپەراسیۆنەكە ئامانجەكانی خۆی بەسەركەوتووانە پێكاون".
لە راگەیاندراوەكەدا ھۆشداری دراوەتە ھاوپەیمانی عەرەبی "لە بەردەوامبوونی لەسەر كاری دوژمنكارانە و ئابلوقەدان"، جەختیشیكردەوە ھێزە حوسییەكان لە ئامادەباشیدان بۆ ئەنجامدانی "كردەوەی سەربازی توندتر و بەھێزتر لە میانی ماوەی داھاتوودا".