لەبارەی پرۆسەی خوێندن بڕیار دەدرێت

K24 – ھەولێر

ئەمڕۆ چوارشەممە 7/4/2021، لیژنەی پەروەردە و خوێندنی باڵا لە پەرلەمانی كوردستان، لەگەڵ بەرپرسانی پەروەردە و یەكێتی مامۆستایان كۆدەبنەوە، بۆ ئەوەی بڕیارێكی گونجاو لەبارەی پرۆسەی خوێندن بدەن. سەرۆكی لیژنەی پەروەردەش دەڵێ "لەگەڵ دەستپێكردنەوەی خوێندنی ئەلیكترۆنی نیم، ھەوڵدەدەین دەرەچەیەك بدۆزینەوە".

عەبدولسەلام دۆڵەمەری، سەرۆكی لیژنەی پەروەردە و خوێندنی باڵا لە پەرلەمانی كوردستان لە كۆنفرانسێكی رۆژنامەوانیدا رایگەیاند: "ئەمڕۆ لەگەڵ بەرپرسانی وەزارەتی پەروەردە و یەكێتی مامۆستایان كۆدەبینەوە، بۆ ئەوەی دەرەچەیەك بۆ پرۆسەی خوێندن بدۆزینەوە".

گوتیشی: "بەھۆی ھەڵكشانی ژمارەی تووشبووانی كۆرۆنا پێمان وایە ئەستەمە بتوانرێت ئێستا دەرگای قوتابخانەكان بە رووی قوتابیان دا بكرێتەوە و كەسیشمان ئامادەنین ئەو بەرپرسیاریەتییە گەورەیە بخەینە ئەستۆی خۆمان و ریسك بە ژیانی مامۆستایان و قوتابیان بكەین، ئایا تاكە بژاردە ئەوەیە خوێندنی ئەلیكترۆنی دەستپێبكاتەوە؟ یان دەرەچەیەكی دیكە ھەیە؟، دەمانەوێت لەم كۆبوونەوەیە جێگرەوەیەكی دیكە بدۆزینەوە و بتوانرێت بەردەوامی بە پرۆسەی خوێندن بدرێت".

عەبدولسەلام دۆڵەمەری، راشیگەیاند: "بە رای خۆم لەگەڵ خوێندنی ئەلیكترۆنی نیم، بەڵام ئەگەر جێگرەوەی دیكەمان نەبوو بە ناچاری دەبێ بڕیار بدرێت دەست بە خوێندنی ئەلیكترۆنی بكرێتەوە، ئومێد دەكەم نەگەینە ئەو قۆناغە و بتوانین دەرەچەیەك بدۆزینەوە".